MINISTRA DEZENVOLVIMENTU INTERNASIONAL AUSTRALIA

Ministra Dezenvolvimentu Internasionál Australia, Melissa Parke MP akompañadu hosi Vise-Ministru Solidariedade Sosiál, Jacinto Rigoberto Gomes de Deus, hodi halo vizita ba PRADET no Sentro Rehabilitasaun Nasional ho objetivu atu haree diretamente kondisaun iha fatin hirak ne’e. Vizita ne’e hala’o iha loron Segunda-Feira, (05/08/2013).

Hafoin vizita, Vise-Ministru MSS, Jacinto Rigoberto Gomes de Deus hateten, Ministra Dezenvolvimentu Internasionál Australia ne’ebé vizita PRADET ne’ebé hanesan mós MSS nia parseiru ida iha área dezenvolvimentu violénsia bazeia ba jéneru no violénsia doméstika, tanba Australia liu hosi Australian Agency for International Development (AusAID) mós suporta anualmente orsamentu ba iha instituisaun hirak ne’e liu-liu PRADET liu hosi justice facility ne’ebé desde tinan 2002 to’o agora fó suporta orsamentu hamutuk pur-volta 1,6 miloins dollares Amerikanu.

Iha lokraik Ministra Dezenvolvimentu Internasionál Australia, Melissa Parke MP, vizita mos Sentru Rehabilitasaun Nasionál (ASSERT) tanba sira mós fó apoiu orsamentu pur-volta rihun 40 resin dollares Amerikanu, liu hosi programa East Timor Community Assistance Scheme (ETCAS) ne’ebé mak halo dadauk hela kadeira roda hodi fornese ba ema defisientes sira.

Vise-Ministru hatutan liu tan katak, AusAID desde primeiru Governu tenta apoiu Governu Timor-Leste liu hosi Ministériu Solidariedade Sosiál hodi dezenvolve polítika nasionál ba defisiente, no polítika ne’e konsege finaliza iha fin 2012 iha mandatu IV Governu nian. Agora dadauk, dehan Vise, iha ona sector working group sia (9) ne’ebé mak atu dezenvolve polítika ne’e para tau ba iha planu asaun ho komitimentu hosi Ministra Dezenvolvimentu Internasionál Australia ninian bele realiza i hatudu katak sira iha komitmentu ne’ebé mak aas atu kontinua suporta Timor-Leste liu-liu iha área defisientes nomos iha área violénsia bazeia ba jéneru.

Iha sorin seluk, Ministra Dezenvolvimentu Internasionál Australia, Melissa Parke MP, hato’o sentimentu kontenti mai vizita Timor-Leste i primeira vez nia mai iha Timor-Leste, ho objetivu atu haree diretamente saida mak akontese ona ho serbisu programa ba dezenvolvimentu, nomós kria relasaun di’ak ho Governu Timor-Leste no asegura programa sira ne’e nia benefísiu ba prioridade dezenvolvimentu Timor-Leste nian. Sira mós kontenti tebes tanba iha fatin hirak ne’e kria amizade ida di’ak liu tan ho Governu Timor-Leste no, ba oin sira sei ajuda nafatin atu dezenvolve Timor-Leste ba iha futuru.

Ministra ne’e realsa liu tan katak, Australia iha ona komitmentu atu promove no dezenvolve ema ho difisiénsia no sira hatene katak programa hirak ne’e presija serbisu efetivu ba ema ho defisiénsia, sira mós hanoin kona-ba ema ho defisiénsia iha Australia i sira iha difikuldade tebes ba asesibilidade.

Wainhira haree ba ema ho difisiénsia iha mundu, ema sira ne’e avansadu ona iha dezenvolvimentu, sira hakarak asegura no sira inklui ajuda programa Australia ne’ebé iha ona Embaxadór ba Dezenvolvimentu Ezkluzivu Defiesiénsia i ema ida mak aplika doasaun ba nasaun nomós nasaun sira seluk, inklui dezenvolvimetu disabilidade inkluzivu iha sira nia programa. Ami mos halo aplikasaun ba Timor-Leste i iha esperansa ba ema ho defisiénsia katak hakarak sira mos moris kontenti no laiha presaun no bele senti katak sira bele moris hanesan ema.

Iha vizita ne’e akompaña mós Embaxadór Australia ba Timor-Leste, Xefe AusAID nomós Diretór hosi Instituisaun ida-idak ninian ho ninia Funsionárius.

This post is also available in: English Portuguese

Author: admin