MINISTRA MSS HALA’O VIZITA TRABALLU BA SSSMV INKLUI

Ministra Solidairedade Sosiál, Dra. Florentina Smith akompaña hosi Diretór Nasionál Dezenvolvimentu Sosiál-DNDS, Florençio Pina Dias Gonzaga ho komitiva tomak hala’o vizita ba Sentru Solidairedade Sosiál Munisípiu Viqueque-SSSMV no Instituisaun Solidairedade Sosiál-ISS ne’ebé ejiste iha Munisípiu Viqueque, hanesan Uma Mahon Paz Knua Haberan Komunidade-KHC, Kolegio St. Francisco de Assis, Kolegio Ossu-Sta. Bhakita no Kolegio Sto. Lucas. Atividade ne’e hala’o durante loron rua, hahú hosi loron Sexta-Feira-Sábadu, iha Munisípiu Viqueque (08-09/12/2017).

Iha okaziaun ne’e, Ministra Solidariedade Sosiál, Dra. Florentina Smith hateten, vizita traballu ba Sentru Solidariedade Sosiál Munisípiu Viqueque (SSSMV) no Instituisaun Solidariedade Sosiál (ISS) ho objetivu atu hatene di’ak liu servisus ne’ebé sira hala’o ho nia difikuldade tomak ne’ebé sira infrenta iha servisu fatin, nune’e ba oin, bele hadia i bele fó atendimentu ne’ebé di’ak liu ba komunidade sira, liu-liu ba benefisiárius sira.

Vizita ida ne’e, dehan Ministra MSS, sai mós hanesan referénsia ida ba Ministériu, atu bele dezeiña ninia programa no orsamentu iha tinan 2018, tanba ISS mak sai hanesan liman no ain ba MSS hodi hatutan servisu Ministériu nian, ne’ebé fó atendimentu direta ba komunidade sira.

Antes ne’e, Ministra hala’o ona Vizita ba Sentru Solidariedade Sosiál (SSS) no Instituisaun Solidariedade Sosiál (ISS) iha Munisípiu Manatuto, Baucau inklui Munisípiu Suai.