MINISTRA MSS VIZITA POSTU ADMINISTRATIVU ATAURO

Ministra Solidariedade Sosiál, Sra. Isabel Amaral Guterres hamutuk ho ekipa hosi Sentru Solidariedade Munisípiu Dili hala’o vizita ba Postu Administrativu Ataro, Aldeia Adara, hodi fó apoiu aihan ba komunidade sira ne’ebé afetadu hosi Elnino. Vizita ne’e hala’o iha loron Terça-Feira, (22/03/2016).

Iha vizita ne’e, Ministra halo mós diálogu ho komunidade sira hodi kóalia kona-ba asuntu sosiais sira seluk ne’ebé Ministériu ne’e hala’o. Vizita refere hala’o durante loron rua nia laran, hahú hosi Segunda-Feira to’o Tersa, MSS fó apoiu sasan hirak mak hanesan, Foos, Formungu, Koto, Bimoli, Sardina, Biti no Lipa. Antes ba Aldeia Adara, Ministra ho komitiva hala’o vizita mós ba defisiente nain 2 iha Postu Administrativu Atauro Vila, no vizita mós Armajen MSS nian no kontinua vizita semiteriu desteradu sira ne’ebé mate durante okupasaun nia laran.

Iha biban ne’e, Ministra MSS, Sra. Isabel Amaral Guterres hateten, vizita ida ne’e hala’o bazeia ba informasaun no pedidu ne’ebé hato’o hosi komunidade, i ami nia sentru Munisípiu Dili nian mai halo ona asesmentu. Bainhira sira rona informasaun katak hahan menus iha Atauro, liu-liu iha Aldeia Adara, tanba impaktu hosi Elnino ou bailoron naruk, ho ida ne’e mak Primeiru Ministru rasik husu atu haree no fó asisténsia ruma. “Ami mai atu fó apoiu aihan ba komunidade sira iha ne’e, la’ós iha Aldeia ida ne’e deit, maibé sei haree mós ba komunidade tomak iha Atauro nian, i ida ne’e sei servisu hamutuk ho Autoridades lokais sira atu oinsá bele fó atendimentu,” dehan Ministra.

Liu tan, Ministra esplika, kona-ba preoukupasaun ne’ebé komunidade foti iha diálogu, liu-liu asuntu Bolsa da Mãe, Idozos no defisientes, katak iha Aldeia ida ne’e rasik, idozos balun labele to’o iha fatin atu simu sira nia osan no sira informa katak hosi BNCTL no funsionariu balun husu katak benefisiáriu sira ne’e tenke selu sira nia transporte para sira bele mai to’o iha sira nia fatin atu halo pagamentu, tanba ne’e MSS sei ko’alia ho Direitór BNCTL, atu haree problema ne’e, hodi bele rezolve. Haree ba transporte marítima hosi parte MSS hanoin ona oinsá haree orsamentu hodi bele sosa ró ahi ida hodi bele transporta ou atende maluk sira ne’ebé mate, nomós hodi tula kaxaun mai iha Atauro, no Atauro ba iha Sukus iha Atauro nia laran.

Entertantu, Administrador Postu Atauro, Manecas da Conceição Soares hateten, relasiona vizita Ministra nian ne’e atu haree no rona direita hosi komunidade sira bazeia ba pedidu ou preukupasaun ne’ebé komunidade rasik hato’o ba iha MSS, liu-liu problema kona-ba Elnino, ne’ebé nia impaktu boot ba iha Postu Administrativu Atauro. “Udan mai la ho nia tempu i komunidade sira halo toos hodi kuda batar, maibé la iha nia rezultadu ne’ebé di’ak hosi atividade agrikultura ninian no aihan rezerva ne’ebé sira rai hodi sustenta sira nia moris hodi hein koilleta mós sira tenke kuda hotu, tanba ne’e mak hata’o pedidu ba MSS atu bele mai haree ho matan,” dehan Administradór Atauru.

Lia fuan hanesan mai mós hosi Xefe Aldeia Adara, João da Costa katak, difikuldade ne’ebé mak komunidade hasoru iha Aldeia ne’e mak bailoron naruk ou Elnino ne’ebé mak fó impaktu menus aihan ba komunidade sira, tanba ne’e sira persiza tebes apoiu ruma hosi parte Governu.

Iha biban ne’e partisipa mós, Diretór Sentru Solidariedade Munisipiu Dili, Agustinho Cosme Belo ho nia funsionárius, Diretóra Centru Reabilitasaun Nasionál-CRN, Veronica das Dores, , ekipa hosi Cruz Vermelha, Autoridades lokais no komunidades iha área refere.

This post is also available in: Tetum