MINISTRA MSSI HALA’O ENKONTRU HO PRESIDENTE ZEESM

Ministra Solidariedade Sosiál no Inkluzaun-MSSI, Armanda Berta dos Santos hala’o Enkontru ho Presidente Autoridade Rejiaun Administrativa Espesial Oecusse Ambeno no Zona Espesial Ekonómia Sosiál Merkadu-ZEESM, Mari Bin Amudi Alkatiri. Objetivu hosi enkontru ne’e hodi ko’alia kona-ba implementasaun programa Rejime Kontributivu Seguransa Sosiál iha ZEESM, Enkontru refere hala’o iha Edifísiu ZEESM-Farol-Díli, Loron Segunda-Feira, (22/10/2018).

Hafoin enkontru, Ministra Solidariedade Sosiál no Inkluzaun, Armanda Berta dos Santos hateten, enkontru ida ne’e ko’alia kona-ba Protesaun Seguransa Sosiál, liu-liu ba Rejime Kontributivu Seguransa Sosiál iha Timor-Leste, tanba ne’e ohin hasoru malu ho Presidente ZEESM atu bele fó hanoin oinsá bele preve mós orsamentu 6% ba iha empregadór nomós orsamentu retensaun ba 4%, tanba hahu hosi fulan Janeiru to’o Augostu Governu mak sei selu, maibé hahu hosi fulan Setembru ba oin trabalhadores ida-idak bele kontribui ona 4% hosi sira nia saláriu rasik, tanba ne’e nuda’ar Ministra bele halo komunikasaun hodi informa atu bele haree mekanismu ida ne’ebé mak di’ak atu bele implementa mós Rejime Kontributivu Seguransa Sosiál ida ne’e iha ZEESM.