MINISTRA VIZITA SSSML

Ministra Solidariedade Sosiál no Inkluzaun, Armanda Berta dos Santos hala’o vizita ba Sentru Solidariedade Sosiál Munisípiu Liquiça-SSSML hodi bele haree no rona direitamente funsionárius sira nia kondisoins servisu no preokupasoins atu nune’e iha futuru bele hadia no melhora di’ak liu tan atendimentu ba ita nia komunidade sira iha SSSML. Vizita ne’e hala’o iha Loron Kinta-Feira, (27/09/2018).

Iha vizita ne’e, Ministra Solidariedade Sosiál no Inkluzaun, Armanda Berta dos Santos hateten, objetivu hosi vizita ida ne’e, atu bele haree direitamente ba funsionáriu sira no rona mós sira nia preokupasoins ne’ebé mak sira enfrenta durante ne’e, hodi nune’e ita bele haree no hadia servisu, liu-liu oinsá bele halo atendimentu ida ne’ebé mak di’ak ba ita nia komunidade sira (benefisiárius-red).

Preokupasoins ne’ebé funsionárius sira hato’o mak hanesan, menus kapasitasaun ba funsionárius, dupla funsoins, fasilidades ou ekipamentus, nível funsionárius nsst, esplika Ministra.

Depois vizita SSSML, Ministra kontinua vizita ba Colegio Santa Teresa de Ávila ne’ebé durante ne’e hetan apoiu hosi MSSI, hodi bele haree direitamente ba labarik sira ho sira nia kondisoins no problemas sira hotu ne’ebé sira enfrenta, liu-liu iha fulan hirak ikus ne’e sira seidauk hetan apoiu hanesan fo’os hosi MSSI rasik.