MSS HO SES REALIZA WORKSHOP KONA-BA KOESAUN SOSIÁL

Atu komunidade hotu moris iha pas no harmonia nia laran, Ministériu Solidariedade Sosiál (MSS) liu hosi Departamentu Hari’i Pas no Koesaun Sosiál hamutuk ho Sekretáriu Estadu Seguransa (SES) liu hosi Diresaun Nasionál Prevensaun Konflitus Komunitária (DNPKK) realiza workshop ida ho objetivu hodi deskuti kona-ba oinsá halo koordenasaun Inter-ministerial entre MSS ho SES hodi buka formas oinsá intervensaun ba komunidade atu fó prevensaun no resposta ba konflitus iha nível komunidade bele la’o lalais no susesu, workshop ne’e hala’o Segunda-Feira, iha Liquiça-Tibar, (08/07/2013).

Iha workshop ne’e, Vise-Ministru MSS, Jacinto Rigoberto Gomes de Deus hateten, Instituisaun rua ne’e iha objetivu ida deit katak atu asegura estabilidade no prevene konflitu, tanba ne’e mak ita nia nasaun sei iha frazilidade nia laran, presiza duni atu fortifika Instituisaun rua ne’e nia papel, atu Instituisaun rua ne’e forti liu tan hodi halo intervensaun iha terenu, atu atinji objetivu ne’e presiza iha ekipa ida atu wainhira rona informasaun ruma Instituisaun rua ne’e tenke koordena malu i identifika problema ne’ebé mak iha atu oinsá bele halo intervensaun.

Vise realsa liu tan, ba oin persiza halo enkontru kada fulan tolu-tolu hodi informa ba malu kona-ba progresu no dezafius hanesan ekipa ida ho nune’e bele fó klaru ba parseirus sira liu-liu UNDP para sira mós bele iha liña ida klaru ba sira. Vise-Ministru husu atu rezultadu hosi workshop ida ne’e halo mós relatóriu ida atu relata ba Primeiru-Ministru (PM) hodi sai hanesan desizaun konjuntu entre MSS ho SES.

Atu taka, Vise-Ministru sujere ita tenki iha onestidade ba malu no hakas-an hodi koopera ba malu ba situasaun hotu-hotu hodi foti desizaun hanesan ekipa ne’e bele forti liu tan to’o V Governu Konstitusional nia mandatu hotu, katak Rigoberto.

Iha sorin seluk, Direitór Nasionál Asistensia no Koesaun Sosiál, Amandio A. Freitas hateten, objetivu hosi workshop ne’e hanesan koordenasaun inter-ministerial entre MSS ho SES, tanba entre Instituisaun rua ne’e iha Departamentu DNAKS ho DNPKK hala’o programa kuaze atu hanesan liu-liu iha área prevensaun konflitu, tanba ne’e mak ohin hanesan oportunidade diak ida atu Instituisaun rua ne’e bele halo refleksaun nomos identifika gap, Similarizasaun i diferénsias no tenta mós atu halo eskenáriu hodi nune’e iha implementasaun programa ne’e labele iha duplikasaun i halo diskusaun mós kona-ba oinsá fó resposta ba konflitus ne’ebé mak akontese.

Direitór ne’e informa katak, durante ne’e DNAKS liu-liu Departamentu hari’i Pas no Koesaun Sosiál hala’o aktividades bazeia ba planu asaun anual (PAA) ne’ebé mak iha, maibe iha implementasaun atividades iha similarizasaun entre Instituisaun rua ne’e, iha nível implementasaun téknika iha problema balun ne’ebé resposta no halo intervensaun direta hosi Departamentu hari’i Pas no Koesaun Sosiál i iha problema balun mós sistema resposta ne’e halo ho integradu entre SES ho MSS, Exemplu hanesan problema Naktuka nst.

Direitór ne’e hatutan liu tan katak, workshop ida ne’e bele kualia no haree para oinsá iha futuru Instituisaun rua ne’e bele servisu diak liu tan no la iha duplikasaun i bele iha konseitu intervensaun ne’ebé diak intra no entre Instituisaun, tanba ne’e mak ohin hanesan pasu ida tu’ur hamutuk hodi halo diskusaun atu nune’e molok MSS liu hosi DNAKS halo planu estratéjiku sinku (5) anos ne’e bele iha ona no mai ho vizaun ida ne’ebé klaru.

Progresu espektativa hosi workshop koordenasaun interministerial ida ne’e mak atu iha planu estratéjiku ida ne’ebé iha planu ne’e rasik la iha duplikasaun i mós difini resposta ne’ebé halo intervensaun integradu, maibe la’ós integradu ne’e atu tau mós iha planu estratéjiku tanba iha kontekstu balun ho limitasaun kapasidade ou rekursus Institusional ne’e persiza duni intervensaun integradu, maibe iha programa balun persiza separa duni hodi nune’e intervensaun ne’e bele iha Direisaun ida lolos hodi hetan solusaun, esplika Amandio.

Entertantu Direitóra Nasionál Prevensaun Konflitus Komunitária (DNPKK), Lídia Lopes hateten, workshop ida ne’e diak i importante tebes, tanba MSS no SES nudar instituisaun Governu ne’ebé lei organika difini ona kna’ar no responsabilidade i workshop ida ne’e positivu tebes, tanba liu hosi workshop ne’e MSS liu-liu DNAKS bele hatene nia servisu nune’e mós DNPKK.

Direitóra ne’e espera katak iha futuru DNAKS ho DNPKK bele iha koordenasaun no kooperasaun servisu ne’ebé mak diak hodi halo prevensaun ba konflitus nune’e mós hosi parte DNAKS nian oinsá bele hari’i pas no halo diálogu iha parte ne’ebé mak iha konflitu. Nia informa liu tan katak, durante ne’e sira sempre la’o no servisu hamutuk wainhira ba hala’o diálogu no tara bandu ruma maibe ne’e informalmente, tanba ne’e mak liu hosi workshop ne’e iha futuru bele hametin no hadia diak liu tan kooperasaun ne’ebé mak durante ne’e la’o.

Iha prosesu implementasaun servisu, iha mós dezavius balun ne’ebé DNPKK infrenta mak hanesan limitasaun rekursus humanus, limitasaun finanseirus, fasilidade servisu, tanba ne’e mak dala barak Diresaun identifika kausa konflitu no problema barak maibe DNPKK labele resolve no atende tanba ho limitasaun ne’ebé mak ohin mensiona iha leten, maibe ho limitasaun ne’ebé mak iha sira sempre hala’o servisu nafatin, tanba ne’e mak Diretora ne’e husu atu nune’e wainhira sira ba identifika problema MSS bele fó apoiu finanseiru ruma atu nune’e bele koopera hamutuk hodi bele fó solusaun ba problema sira ne’ebé mak iha, dehan Lopes.

Iha workshop ne’e partisipa mós, Sekretáriu Estadu Seguransa, Francisco da Costa Guterres, Xefes Departamentu no Funsionarus DNAKS ho DNPKK, UNDP nomos g7 group .