MSS organiza enkontru Inter-Ministeriál ba área ema

Atu implementa polítika nasionál ba ema ho defisiênsia kona ba planu no estratejia maka Ministériu Solidariedade Sosiál (MSS) liu hosi Diresaun Nasionál Assisténsia no Koesaun Sosiál (DNACS), organiza enkontru kordenasaun Inter-Ministeriál ba ema ho defisiênsia hodi partisipa iha dezenvolvimentu nasionál ba aspetu hotu-hotu iha sira nia moris. Enkontru refere hala’o iha Salaun Edifisiu Sentrál MSS, Kaikoli-Dili, Iha Loron Kuarta-Feira, (22/05/2013).

Iha sesaun dahuluk Diretór DNACS, Amândio Amaral Freitas hateten, enkontru ida ne’e foka liu ba assuntu iha área 3 mak hanesan Jender, Saúde no mós Edukasaun, hosi MSS kolabora ho Ministériu relevantes ne’ebé importante teb-tebes ba assuntus defisientes no halo ona mós over view ba workshop ida uluk lao ho susesu no apresia tebes ba enkontru ida ne’e ho kolaborasaun diak inter-Ministérial tanba Timor-Leste la’ós foin mak koalia kona ba assuntus ka programas defisientes ba tinan ida ne’e maibe iha tinan-tinan ho vontade makas no forte atu lori assuntus defisientes ne’e ba oin.

Amândio haktuir tan katak, iha programa no assuntus balun mak sei dezafia nafatin para ita bele halo maibé faseadamente pasu por pasu komesa hakat, tanba ida ne’e maka iha oportunidade ne’e ita organiza malu halo enkontru hodi diskute ba área 3 liu-liu atu koalia kona ba programa sektoral ida-idak ne’ebé liga ho prioridade iha polítika nasionál ba ema ho defisiênsia.

“Planu estratéjiku ka planu longu prasu 5 anos kada Ministériu nian no ohin iha aprezentasaun 3 kada Ministériu no mós ita sei kontribui ba aprezentasaun sira ne’e ho ita nia espetativa, ikus liu maka ita hakarak enkontru ida ohin bele fo rezultadu diak atu nune’e kada Ministériu iha ona opsaun tuir prioriedade programa ne’ebé kontempla iha polítika nasionál atu integra iha Planu asaun anual kada Ministériu” dehan Amândio.

Iha fatin hanesan Xefe Departamentu ba Defisientes, Mateus da Silva hato’o, objetivu hosi enkontru ne’e atu diskute no tau iha planu kada Ministério atu halo iha dala 8 mais tenki muda tanba haree ba tempu ne’ebé maka iha entaun sei halo Ministériu tolu enkontru dala ida no oinsá para bele prepara planu ba 2014 ne’e atu mensiona mós planu orsamentu kada Ministériu hodi tau matan ba ema defisientes sira, nune’e mós fó hanoin ba ita atu oinsá bele trata ba ema defisiênsia ne’e ho dignidade no sira ne’e mós trata nudar ema hanesan ema sira seluk, bele asesu ba edukasaun, Saúde, informasaun, transporte no seluk tan.

Tuir Xefe ne’e katak, oinsá atu servisu hamutuk ho parseirus no Ministériu relevantes sira ne’ebé maka tau prioriedade hadia polítika ne’e para ita bele implemente polítika ne’e, se lae polítika ne’e foti hanesan livru ka siensias ruma para ita estuda deit hanesan teoria maibé atu implementa polítika ne’e iha atividade riil ba ema ho difisiénsia seidauk bele realize, enkontru ne’e husi Instituisoens tolu hanesan Ministériu Saúde, Ministériu Edukasaun no Sekretaria Estadu Promosaun Igualdade, kada ida-idak aprezenta sira nia planu no programa ba ema defisentes sira no ba oin mós iha planu kuandu polítika ne’e implementa sei kria mós Konsellu Nasionál ida ba ema defisientes sira para oinsá halo monitorizasaun ba atividades kada Ministériu, sosiedade sivil nebe’e trata ba ema ho defisientes.

Iha parte seluk, Domingos Gusmão hanesan ema Defisiente ida hateten, senti kontente ba enkontru ne’ebé Governu organiza programa no planu ida ne’e tanba iha ejijensia no sujestaun ne’ebé hato’o kona ba atendementu ba ema defisientes sira ne’e no liu hosi aprezentasaun hosi Ministériu Saúde, Ministériu Edukasaun no SEPI ida ne’e bele hatene kona ba planu no programa maibé tenki iha rekursus umanus diak ida no persija hadia teknik no sistema ida diak para bele atende ema defisientes sira ne’e bele lao diak liu tan.

Domingos hatutan tan katak defisientes sira benefisia uitoan tanba hetan subsidiu apoiu maske oituan maibé Governu bele tau matan ona iha área ida ne’e ho kapas no diak.

Iha enkontru ne’e partisipa mós representante Sekretaria Estadu Promosaun Igualdade, Ministériu Saúde, Chefe Departamento Doenças não Contagiosa, Herculano Seifas dos Santos, Ministériu Edukasaun, Kordenasaun Nasionál ba Edukasaun Inklusivu, José Monteiro, Direitór Fundasaun Klibur Domin, Joaquim Freitas Soares, Assessores Nasionáis no Internasionáis, representante ASSERT no mos Defisientes sira.