MSSI AKOMPAÑA PR HALO DIÁLOGO HO KOMUNIDADE …

Ministra Solidariedade Sosiál no Inkluzaun, Armanda Berta dos Santos hamutuk ho representante Parlamentu Nasionál, membrus VIII Governu konstitusional inklui korpus diplomatikus akompaña Presidente Repúblika Timor-Leste, Francisco Guterres “Lu Olo”, ho nia espoza, Cidália Nobre Lopes Mauzinho Guterres, halo diálogo ho Autoridade Lokal no Komunidade Munisípiu Covalima. Diálogo refere hala’o iha Gedung Wanita, Suku Debos, Postu Administrativu Suai Villa, Munisípiu Covalima, Loron Sexta-Feira, (28/06/2019).

Iha biban ne’e, Presidente Repúblika Timor-Leste, Francisco Guterres “Lu Olo” hateten, diálogo ida ne’e atu informa no hatene komunidade nia prekupasaun hodi presidente bele hato’o ba orgaun ezekutivu atu nune’e bele halo programa ida ne’ebé diak no implementa iha área hotu-hotu.

“Ba komunidade Muníspiu Covalima Xefe Estadu konsidera prekupasaun sira ne’ebé komunidade hato’o hanesan mós prekupasaun estadu nian tanba atensaun sentrál ne’ebé boot liu estadu ida nian mak ema nia moris”.

Xefe Estadu hatutan, vizita ida ne’e hanesan segundu vizita ofisial ba Munísipiu hotu-hotu no hahu vizita husi Munísipiu Viqueque no ohin iha Munísipiu Covalima ho objetivu hanesan atu rona direita povu sira nia hanoin, nune’e Presidente Repúblika bele transmiti ba orgaun soberanu sira hodi bele halo dezenvolvimentu ba ita nia rai ida ne’e ho diak.

Xefe Estadu realsa liu tan, Prekupasaun povu Munísipiu Covalima infreta maka hanesan área sosiál, veteranus, estrada, fronteira, turismu, edukasaun, saude, ekonomia, agrikultura inklui be’e moos no sel-seluk tan.

Iha fatin hanesan, Ministra MSSI, Armanda Berta dos Santos hato’o, prekupasaun ne’ebé ohin komunidade sira husu ne’e importante tebes liu-liu hanesan governasaun ida iha responsabilidade toma medida ne’ebé adekuadu hodi responde mós ba prekupasaun ohin komunidade sira husu mak kona-ba seguransa sosiál.

Ministra hateten tan, liu husi diálogo ida ne’e ita bele rona informasaun direita husi komunidade sira nia prekupasaun no difikuldade iha área sosiál ninia kona-ba saida maka sira infrenta iha Munísipiu Covalima ida ne’e no ba oin MSSI sei esforsu no haree diak liutan ba asuntus sosiál ne’ebé maka ohin komunidade sira husu.

Entertantu, Administrador Munísipiu Covalima, Afonso Nugueira Nahak hato’o, diálogo ida ne’e importante teb-tebes tanba komunidade bele hasoru malu ho ita nia Presidente Repúblika to’o iha ita hotu nia le’et, bele hato’o no haklaken mesajen hodi hametin ita nia seguransa, unidade no estabilidade ba ita nia rai Timor-Leste liu-liu mai iha ita nia Munísipiu Covalima no komunidade bele direita hato’o nia prekupasoes no difikuldades ba Xefe Estadu.

Hafoin diálogo, iha ámbitu Kampaña Nasionál “Sidadaun ida Ai-Oan ida “, ne’ebé Xefe Estadu promove, Presidente Repúblika, Francisco Guterres “Lu Olo”, entrega simbolikamente ai-oan mahoni ba Administrador Postu hitu iha Munisípiu Covalima mak hanesan Administrador Postu Fatululik, Fatumean, Fohorem, Maucatar, Suai, Tilomar no Zumalai.

Partisipa iha dialogu maka hanesan, Komandante PNTL Munisípiu Covalima, António de Sá, Presidente Instituisaun Seguransa Sosiál-INSS, Longuinhos Armando, Diretóres Nasionais no Munisipais inklui Xefes Departamentus husi Liñas Ministeriais, Veteranus, Sosiedade Sivil, Konvisaun Relijioju no Estudante sira.