MSSI FÓ ASSITÉNSIA HUMANITÁRIA BA EMA MORAS

Ministra Solidariedade Sosiál no Inkluzaun, Armanda Berta dos Santos no Vise Ministra, Signi Verdial hamutuk ho Ministériu Saúde no Servisu Agua no Saneamentu-SAS fó asisténsia humanitária ba ema moras sira ne’ebé hala’o tratamentu tradisionál. Fatin tratamentu tradisionál refere, hahu loke hosi tinan 2014, iha Aldeia Turleu, Suku Tibar, Munisípiu Liquiça, Loron Kuarta-Feira, (19/09/2018).

Aihan no sasan hirak ne’ebé mak MSSI entrega mak hanesan, Fo’os, Biti, Lona, Kulsaun, Toalha, Bikan, Kopu, Kanuru, Sanan, Mosquiteru, nsst. Hafoin entrega sasan hirak ne’e Ministra no Vise Ministra MSSI kontinua akompaña pagamentu ne’ebé hala’o hosi Banco Nacionál Comércio de Timor-Leste-BNCTL ba idosa ida ne’ebé ho kondisaun moras.

Iha oportunidade ne’e, Ministra Solidariedade Sosiál no Inkluzaun, Armanda Berta dos Santos hateten, Situasaun no kondisaun ne’ebé dadaun ne’e kuradór no pasiente sira infrenta nu’udar MSSI nia servisu, tanba ne’e loron hirak liu ba MSSI hala’o tiha ona vizita urjenti ida hodi identifika no haree pasiente sira nia kondisaun.

Ho dadus identifikasuan ne’e MSSI servisu hamutuk ho diretór munisípiu nian hodi fó assiténsia humanitária inklui mós pagamentu ba idosa ida ne’ebé hala’o tratamentu iha fatin refere. Konaba kondisaun uma nian MSSI sei servisu hamutuk ho parte relevante sira tanba MSSI nia kompetensia mak oinsá bele fó apoiu humanitária ba pasiente sira, esplika Ministra.

Nune’e mós, Salvadór Carvalo hanesan Kuradór hateten, Pasíente sira ne’ebé mai hala’o tratamentu iha fatin ne’e kompostu hosi munisípiu sanulu resin rua (12), Pasiente sira ne’ebé hetan moras todan hanesan tohar, naksalak no estruk sei hetan tratamentu ho prazu fulan ida, karik iha problema ruma iha pasiente nia uma laran, maibe sira seluk ho moras Kaman hanesan matan a’at, tilun diuk, oan la iha nsst, nia prazu loron tolu bele fila ba uma ho kondisaun ne’ebé diak.

“hau durante ne’e la husu ba estadu, maibe ho grasa Nai maromak nian estadu sira to’o dunik mai iha hau nia fatin hodi haree rasik pasiente sira ne’ebé mak hala’o tratamentu iha ne’e, balun alta tiha ona no balun sei baixa. Hau nia hakarak no husu ba estadu atu bele tau matan diak liu tan hodi nune’e ita nia povu liu-liu ba pasiente sira ne’ebé ho moras grave”, dehan Salvador.

Akompaña Ministra no Vise-Ministra MSSI iha vizita refere mak hanesan Diretór Nasionál Assisténsia Sosiál, Mateus da Silva, Xefe Departamentu Protesaun no Promosaun Direitu Defisientes, António Noronha, Xefe Gabinete Ministra inklui Assesor.

This post is also available in: Tetum