MSSI HALA’O ENKONTRU HO CVTL

Ministra Solidariedade Sosiál no Inkluzaun, Armanda Berta dos Santos hala’o enkontru ho Presidente Cruz Vermelha Timor-Leste (CVTL), Madalena Hanjam ho ninia ekipa. Objetivu enkontru ne’e atu koalia kona-ba servisu hamutuk entre MSSI ho CVTL nomós oinsa estabele akordu ida liga ho programa MSSI no CVTL nian, liu-liu atu responde asuntu dezastre inklui fó apoiu ba ema kbi’it la’ek sira. Enkontru ne’e hala’o iha edifísiu Sentral MSSI-Kaikoli-Díli, Loron Segunda-Feira, (01/07/2019).

Hafoin enkontru Ministra Solidariedade Sosiál no Inkluzaun, Armanda Berta dos Santos hateten, Ohin Ministériu hala’o enkontru ho Cruz Vermelha Timor-Leste (CVTL) hodi koalia kona-ba asuntu Dezastres naturais no iha VIII Governu Konstitusionál asuntu ida ne’e iha ona Ministériu Interior, liu-liu Sekretáriu Estadu Protesaun Sívil no papel MSSI ba asuntu dezastres naturais mak fó apoiu humanitária ba vítima sira depois akontese dezastre. Iha enkontru ida ne’e mós parte MSSI ho CVTL koalia kona-ba oinsá bele estabelese akordu ida hodi servisu hamutuk atu haree no fó apoiu, liu-liu ba ema kbi’it laek sira iha Timor-Leste.