MSSI HALA’O ENKONTRU HO EMBAIXADÓR AUSTRALIA

Ministra Solidariedade Sosiál no Inklusaun-MSSI, Armanda Berta dos Santos hamutuk ho Vise-Ministra MSSI, Signi Chandrawati Verdial hala’o enkontru ho Embaixadór Australia ba Timor-Leste, hodi ko’alia kona-ba koperasaun servisu iha aréa protesaun sosiál nian no oinsa parseirus sira bele fó apoiu nafatin iha aréa refere. Enkontru ne’e hala’o iha Edifísiu Sentral MSS Kaikoli-Dili, Loron-Kuarta-Feira, (04/07/2018).

Iha biban ne’e Ministra hateten, ohin enkontru ho Embaixadór Australia ida ne’e koalia kona-ba oinsa bele halo relasaun no koperasaun bilateral entre nasaun 2 Timor-Leste no Australia hodi kontinua servisu hamutuk iha aréa protesaun sosiál no defisiente sira tanba ne’e maka ba oin atu haree diak liu tan ba asuntu ida ne’e.

Iha fatin hanesan, Embaixadór Australia ba Timor-Leste, Peter Roberts hato’o, ohin ami halo enkontru ida ne’e atu halo koperasaun diak ho MSSI no Australia prontu servisu hamutuk ho Governu foun Timor-Leste iha aréa oi-oin maka hanesan Violénsia Doméstika, Igualidade Jéneru, Defisiente no aréa sosiál sira seluk.

Liu husi enkontru ida ne’e, Embaixadór Australia ba Timor-Leste, entrega mós karta Felisitasaun no Parabéns husi SENATOR THE HON CONCETTA FIERRAVANTI-WELLS (Minister for International Development and the Pacific) ba Ministra no Vise-Ministra MSSI.

Partisipa iha enkontru mak hanesan, Diretór Nasionál Rejime Naun Kontributivu Seguransa Sosiál-DNRNKSS, Leoneto Vicente Faria Caldeira Pereira, Diretora Nasionál Rejime Kontributivu Seguransa Sosiál-DNRKSS, Aida Maria Soares Mota, Xefe Gabinete Ministra no Vise Ministra MSSI, Asesór Nasionál no Internasional.

This post is also available in: Tetum