MSSI HALO AVALIASAUN PROPOSTA BA 35 ISS

Ministériu Solidariedade Sosiál no Inkluzaun-MSSI hahu hala’o avaliasaun proposta ba Instituisoens Solidariedade Sosiál-ISS hamutuk 35 Instituisoens, hodi hetan aprovasaun nune’e bele hatutan servisu MSSI nian ba iha komunidade, liu hosi programa no planu ne’ebé ISS sira trasa ona, Instituisoens hirak ne’e mai hosi Uma Mahon, Orfonatus, Defisientes nsst. Avaliasaun refere hala’o iha Edifísiu MSSI-Kaikoli-Díli, Loron Kuarta-Feira, (19/06/2019).

Ekipa avaliasaun kompostu hosi Gabinete Ministra no Vise-Ministra Solidariedade Sosiál no Inkluzaun, Diretores Gerais MSSI, Diretór Finansas-MSSI, Xefe Departamentu Protesaun no Promosaun Direitus ba Defisientes, Xefe Departamentu Protesaun no Promosaun Direitus ba Feto no Xefe Departamentu ba Labarik. Iha mós ekipa observadór ne’ebé kompostu hosi Gabinete Inspesaun Auditória-GIA, FONGTIL, PDHJ, Komisaun Direitus Labarik inklui Sosiedade Sívil hosi Gabinete Primeiru Ministru.

Hosi 35 instituisoens ne’ebé mak hatama proposta ba MSSI, FOKUPERS mak sai hanesan primeira Instituisaun ne’ebé hetan avalia hosi ekipa avaliasaun no ekipa sei kontinua nafatin avalia ba instituisoens sira seluk hodi hetan aprovasaun. Orsamentu ne’ebé preve hosi MSSI ba Instituisoens hirak ne’e mak hamutuk $.2 miloens.

Iha oportunidade ne’e kordenadór avaliasaun ba Instituisoens Solidariedade Sosiál-ISS, Eugénio João Amado de Maria Soares hateten, ekipa avaliasaun sei haree liu ba propostas Instituisoens sira nian tuir planu, programa no orsamentu ISS nian nomós haree ba existénsia no estrutura instituisoens sira nian ne’ebé liga ba iha Ministériu Justisa atu hetan autorizasaun hodi hala’o sira nia atividades ba iha komunidade, liu-liu ba benefisiárius MSSI nian.

Nune’e mós Vise-Kordenadór Ekipa Avaliasaun, Florêncio Pina Dias Gonzaga hateten, Haree ba tempu ne’ebé mak limitadu tebes atu Instituisoens hirak ne’e hala’o nia ezekusaun orsamentu iha tinan 2019, ekipa avaliasaun sei esforsu-an atu finaliza avaliasaun refere iha tempu badak nia laran, nune’e bele halo transfêrensia orsamentu ba iha konta bankaria Instituisoens sira nian, tarde liu mak iha loron 10 Jullu tinan 2019 hodi sira bele finansia ba sira nia atividades ne’ebé mak sira planeia no trasa ona.