MSSI HETAN VISITA KORTEZIA HUSI UNICEF

Ministériu Solidariedade Sosiál no Inklusaun-MSSI, hetan visita kortezia husi Valeria Taton, ne’ebé representa UNICEF (United Nations Children’s Fund), iha edifisiu Sentral MSSI Kaikoli-Dili, Loron Segunda-Feira, (06/08/2018).

Iha visita kortezia ida ne’e, Vise-Ministra, Signi Verdial hato’o, ita nia representante husi UNICEF ne’ebé mai fó parabens ba Sra. Ministra, Vise-Ministtra no mós oinsá atu reafirma tan sira nia koñesementu ba suporta ne’ebé durante ne’e hala’o ona ho ministériu, no mós haree fila fali ita nia programa hirak ne’ebé antes ne’e asina ona no hetan apoiu orsamentu husi UNICEF ba ministériu por volta $ 600.000 mil dolares amerikanu ba iha atividade oi-oin.

Vise-Ministra informa liutan, ita mós koalia oituan kona-ba tipus protesaun sosiál ida ne’ebé labarik ho idade tinan 1 to’o tinan 5 ladun hetan impaktu diak husi programa Bolsa da Mãe, entaun ita iha sujestaun mós ba UNICEF katak, sekarik bele ita haree fila fali no enkaixa atividade balun ne’ebé persija konsidera mós ba rezultadu hosi relatóriu ne’ebé UNICEF fó.

“ita kontinua halo parseiru ho UNICEF hodi haree ba protesaun labarik sira, liu-liu ba violénsia sira ne’ebé hasoru hanesan; violénsia doméstika, abusu seksuál no mós ita iha politika ida ne‘ebé ministériu hakarak hakbesik liu ita nia asisténsia ba iha baze, ita mós husu asisténsia husi UNICEF sekarik sira halo parseiru no ita persija sira nia ajuda, oinsá atu hakbesik liu tan ita nia servisu ba iha baze no besik liu tan ba povu sira ne’ebé iha aréa rurais”, dehan Verdial.

Visita ida ne’e hala’o hamutuk ho Ministra Solidariedade Sosiál no inklusaun, Armanda Berta do Santos, Diretóres Gerais Ministériu Solidariedade Sosiál no Inklusaun, Xefe Gabinete Ministra no Vise-Ministra MSSI.