MSSI REALIZA SEMINÁRIU NASIONÁL KONA-BA REFORSA …

Ministériu Solidariedade Sosiál no Inkluzaun-MSSI realiza semináriu nasionál kona-ba análisa perspektiva polítika di’ak ba dezenvolvimentu Rekursus Humanus (servisu nain sosiál) iha ambitu bem estar sosiál ba labarik no família hosi estudu komparativu ne’ebé ekipa MSSI hala’o ona iha nasaun Cambodia iha loron 25-29 marsu 2019. Semináriu refere loke diretamente hosi Ministra Solidariedade Sosiál no Inkluzaun, Armanda Berta dos Santos, ne’ebé hala’o iha Edifísiu Sentral MSSI-Kaikoli-Díli, Loron Segunda-Feira, (24/06/2019).

Iha biban ida ne’e, Ministra Solidariedade Sosiál no Inkluzaun, Armanda Berta dos Santos hateten, Semináriu ida ne’e atu koalia kona-ba polítika kona-ba dezenvolvimentu Rekursus Humanus (servisu nain sosiál), liu-liu liga ba bem estar sosiál ba labarik no família. Relasiona ho ekipa MSSI ne’ebé hala’o ona estudu komparativu iha nasaun Cambodia iha tempu badak sira sei hetan sertifikadu no sira iha ona koñesimentu no esperiênsia atu bele sai hanesan Training of Trainers (ToT) hodi implementa esperiênsia hirak ne’e nune’e bele haree ba bem estar sosiál ba labarik no família sira iha Timor-Leste.

Relasiona ho esperiênsia ne’ebé ekipa MSSI hetan iha Nasaun Cambodia implementa ona iha Munisípiu rua (2) mak hanesan, Munisípiu Ermera, Viqueque inklui RAEOA ne’ebé sai hanesan projeitu pilotu no iha futuru sei kontinua mós iha munisípiu sira seluk. Projeitu ida ne’e hetan finansiamentu hosi Unicef.

Partisipa iha Semináriu ida ne’e mak hanesan, Representante Unicef iha Timot-Leste, Diretores Nasionais no Munisipais, Xefes Departamentus inklui Assesores Nasionais no Internasionais.