MSSI PARTISIPA KOMEMORASAUN LORON KARIDADE BA

Ministra Solidariedade Sosiál no Inklusaun-MSSI, Armanda Berta dos Santos, no Vise-Ministra MSSI, Signi Verdial, hamutuk ho Diretor-Jéral Protesaun Sosiál no Asuntus Kombatentes Libertasaun Nasionál, Eugénio João Amado de Maria Soares, partisipa komemorasaun loron karidade ba labarik oan kiak ba Dala-II, iha salaun Párokia São Pedro São Paulo-Municipiu Aileu, Loron Segunda-Feira, (30/07/2018).

Iha oportunidade ne’e, Ministra MSSI hato’o, Parabéns ba ohin ita bele komemora loron karidade ba labarik oan kiak no familia sira nomós parabéns ba Forum Karidade Humanitaria Timor-Leste-FKHTL, ne’ebé iha hanoin ida diak hodi organiza komemora loron karidade ba oan kiak sira.

Ministra realsa liu tan katak, relasiona ho komemorasaun loron karidade ba oan kiak, ita tenke konsidera saida mak sira sente hanesan mós ita sente agora dadaun ida ne’e no ita nia lei inan rasik mós rekuñese iha artigu 18 No (1) hateten, labarik sira iha direitu ba protesaun husi familia, komunidade nomós estadu, liu-liu hasoru hahalok hotu hanesan la tau matan, diskriminasaun, violénsia no abuzu seksual.

Ministra hateten liu tan, asaun MSSI aloka rekursu ne’ebé efisiensia no maximu hodi fó atendimentu direita ba komunidade Timor-Leste, liu-liu ba labarik no familia ne’ebé vulnerável no fó konfiansa servisu hamutuk ho ajente lokal sira ne’ebé servisu integradu ho MSSI.

“Politika VIII Governu Konstitusional liu husi MSSI estabelese programa bolsa da mãe atu responde ba implementasaun politika bem estar sosiál ba labarik no familia vulnerável ho objetivu jeral tulun hamenus kiak ba ensino básiku obrigatóriu no hasae utilizasaun atendimentu saúde primáriu no hadia konsume familia ho labarik kiak sira nian liu husi alokasaun subsídiu ka osan”, dehan Ministra.

Iha komemorasaun ne’e, Ministra no Vise-Ministra MSSI Simbolikamente entrega sasan ajuda husi MSSI maka hanesan, fos 50 sakas, supermie 50 dos no biti hamutuk 54 no sasan ajuda husi FKHTL maka hanesan orsamentu $ 50 dollar amerikanu ba kada ema ida no entrega ba oan kiak hamutuk nain 68, fos 18 sakas, supermie hamutuk 68 dos no sel-seluk tan.

Partisipa iha komemorasaun mak hanesan, Diretór Nasionál Desenvolvimentu Sosiál-DNDS, Florêncio Pina Dias Gonzaga, Presidente FKHTL, Custodio Soares da Costa, Diretora Sentru Solidariedade Sosiál Munisipiu Aileu-SSSMA, Catarina de Araújo, Xefe Departamentu Assistênsia Humanitaria, Diniz da Silva Buru Bara, Xefe Departamentu Protesaun ba Feto, Maria José Gusmão dos Reis, Xefe Gabinete Ministra no Vise-Ministra MSSI, Reprensentante Administrador Munisipiu Aileu, Reprensentante Komadante PNTL Munisipiu Aileu, Representante Amo Pároku Munisipiu Aileu, familia, inan no aman husi labarik oan kiak sira.

Comments Closed

Comments are closed. You will not be able to post a comment in this post.