Diálogu Iha Munisípiu Viqueque

Presidente Repúblika Timor-Leste, Francisco Guterres “Lu Olo” hamutuk ho membrus VIII governu, korpus diplomatikus inklui representante Parlamentu nasionál hala’o diálogu ho komunidade iha Munisípiu Viqueque, Loron Sexta-feira, 26/04/2019.

Vizita presidente ida ne’e hanesan primeira vizita ofisial ba munisípiu hotu-hotu no hahu hosi Munisípiu viqueque ne’ebé ho objetivu atu rona povu sira nia hanoin no hakarak atu nune’e Presidente Repúblika bele transimite ba orgaun soberania sira hotu hodi bele hala’o dezenvolvimentu ba Timor-Leste.

Vizita ida ne’e mós atu fó hanoin kna’ar Presidente nian no rona preoukupasoens hosi komunidades Munisípiu viqueque nian atu nune’e diálogu ne’ebé ho naran “dada lia ho Lu Olo” bele lori hanoin ida ne’ebé di’ak hodi halo dezenvolvimentu ba munisípiu Viqueque rasik.

Preoukupasoens ne’ebé mak hato’o hosi komunidade Munisípiu Viqueque iha diálogu refere mak hanesan Estrada, bee mos, Saúde, Edukasaun, Agrikultura inklui área Sosiál.

Iha diálogu ne’e, Presidente Repúblika Timor-Leste, Francisco Guterres “Lu Olo” hateten, vizita ida ne’e atu informa, rona no hatene komunidade munisípiu Viqueque nia preoukupasoens hodi presidente bele hato’o ba orgaun ezekutivu atu bele halo programa ida ne’ebé mak di’ak no implementa liu hosi área hotu-hotu.

Persiza hadia setóres hotu-hotu mak hanesan, área Sosiál, edukasaun, Saúde, Agrikultura, bee mos saniamentu inklui Infra-estrutura, buat hirak ne’e hotu mak nesesidades povu nian no povu persiza, tamba ne’e, presidente sei servisu hamutuk ho governu, parlamentu no orgaun sira seluk atu bele hadia kondisoens iha setóres hirak ne’e, ne’ebé komunidades enfrenta, liu-liu komunidades iha munisípiu Viqueque, esplika Presidente.

Iha diálogu ida ne’e mós Administradór Posto Administrativu Ossu, Augusto de Sousa hato’o nia preoukupasaun ba servisu Ministériu Solidariedade Sosiál no Inkluzaun-MSSI atu bele hadia di’ak liu tan dadus idosos no inválides, kria mekanismu pagamentu ne’ebé mak di’ak atu nune’e sira mós bele hetan sira nia direitu.

Entertantu, Ministra Solidariedade Sosiál no Inkluzaun, Armanda Berta dos Santos hateten, ho diálogu ida ne’e bele rona preoukupasoens no difikuldades hosi komunidade rasik ne’ebé durante ne’e sira enfrenta iha munisípiu Viqueque. Dehan Ministra, MSSI mak haree ba subsidiu Idosos no inválides, asisténsia sosiál, apoiu humanitaria no bolsa da mãe.

Relasiona ho preokupasoens komunidades sira nian ne’ebé mak liga ba MSSI nia servisu, liu-liu oinsá bele garante direitu sidadaun sira nian ba programa idosos no inválides, dehan Ministra, ba oin Ministériu sei esforsu hodi haree no atende lalais, sei haree mós kritérius no sistema pagamentu, liu-liu ba Idosos no inválides ne’ebé mak durante ne’e komunidades sempre enfrenta problema. Kona-ba sistema pagamentu idosos no invalides Ministériu halo servisu hamutuk ho Banco Nacionál de Comércio de Timor-Leste (BNCTL) hodi halo pagamentu no iha tempu badak sei halo mós akordu foun ida entre BNCTL ho Instituisaun Nasionál Seguransa Sosiál-INSS atu bele hadia sistema pagamentu. Buat barak mak seidauk la’o di’ak maibe husu ba komunidade sira atu bele kolabora no servisu hamutuk hodi bele hadia ba problema hirak ne’e.

Ikus liu, Ministra Agradese ba komunidades sira iha munisípiu Viqueque ne’ebé hato’o ona sira nia preoukupasoens no ida ne’e bele sai hanesan bokai ida atu bele esforsu di’ak liu tan hodi hadia nune’e bele fo atendimentu ne’ebé mak di’ak ba komunidades sira, liu-liu iha munisípiu Viqueque, katak Ministra.

Hafoin diálogu Ministra Solidariedade Sosiál no Inkluzaun hamutuk ho Primeira Dama, Cidalia Guterres no Vise Ministra Edukasaun kontinua vizita ba Uma mahon no orfonatus ne’ebé existe iha Munisípiu Viqueque hodi hatutan servisu MSSI nian. Objetivu hosi vizita ida ne’e mak oinsá bele haree no rona diretamente preoukupasoens nomós kondisoens uma mahon no orfonatu sira, nune’e ba oin bele fó solusaun ruma ba problemas ne’ebé mak sira enfrenta.

Comments Closed

Comments are closed. You will not be able to post a comment in this post.