Governu fó ona apoiu Emerjénsia ba Vítima Dezastres Naturais

Udan bo’ot ne’ebé mak akontese iha Loron Sexta-feira  (13/03/2020) rezulta komunidade sira iha kapital Díli maioria hetan afetadu hosi  inundasaun, tanba ne’e, Governu liu hosi Ministériu Solidariedade Sosiál no Inkluzaun-MSSI hamutuk ho Sekretáriu Estadu Protesaun Sivil-SEPS inklui Ministériu Estatal-ME hala’o ona distribuisaun sasan emerjénsia ba vítima dezastres naturais iha Suku Lahane Ocidental, Postu Administrativu Vera-Cruz, Munisípiu Díli, Loron Sexta-Feira (21/03/2020).

Iha Suku Lahane Ocidental, Total família 71 mak afetadu hosi unundasaun no hetan ona apoiu humanitária hosi Governu. Apoiu emerjénsia hirak ne’e mak hanesan, Foos, Sardina, Supermi, Mina Bimoli, Bee Aquase, Sana, Balde, Bikan, Kanuru, Lona, Biti, Sabaun, Rinso, nsst.

Iha oportunidade ne’e, Ministra Solidariedade Sosiál no Inkluzaun, Armanda Berta dos Santos hateten, “Governu la taka matan ba ninia komunidade sira ne’ebé mak afetadu hosi dezastres naturais (inundasaun-red). Tanba ne’e, MSSI servisu hamutuk ho Ministériu relevante sira hanesan Sekretáriu Estadu Protesaun Sivil no Ministériu Estatal hodi fó apoiu ba komunidade sira ne’ebé mak afeta hosi dezastres naturais ba udan bo’ot ne’ebé mak foin lalais akontese, maibé importante mak apoiu hirak ne’e ba duni komunidade sira ne’ebé mak merese atu hetan,” esplika Ministra.

Nune’e mós, Sekretáriu Estadu Protesaun Sivil, Alexandrino Xavier de Araújo hateten,  “total dadus ba vítima dezastres naturais hamutuk, 4.286 famílias, maibé governu foin mak distribui sasan emerjénsia ba famílias hamutuk 1.441 no ohin ekipa kontinua nafatin fahe ba iha fatin seluk iha kapital Díli. Ba dadus ida ne’e mós sei hanesan dadus provisóriu tanba ekipa sei kontinua foti dadus. Dehan SE, tipu apoiu ne’ebé mak agora dadaun fó hanesan apoiu emerjénsia, tuir fali mai sei fó apoiu rekoperasaun no rekonstrusaun, maibé apoiu ida ne’e sei iha levantamentu dadus foun atu hatene lolos uma ne’ebé mak merese hodi bele hetan rekonstrusaun”, katak Alexandrino.

Comment's