Centro de Apoio à Saúde (CAS) fo atendimentu ba ema ne’ebe ho moras Mental

CAS FÓ ATENDIMENTU BA EMA NE’EBÉ HO MORAS MENTAL HAMUTUK EMA NAIN 50 BA TINAN 2019

Centro de Apoio à Saúde – (CAS) sai hanesan parseiru Ministériu Solidariedade Sosiál no Inklusaun-MSSI hodi hatutan servisu Ministériu nian ba atendimentu ema ho moras mental iha Timor-Leste, tamba ne’e, Média MSSI hala’o intervista ida ho Diretór Centro refere hodi bele hatene lala’ok servisu ne’ebé mak durante ne’e centro halo ba pasientes ho moras mental. Entervista ne’e hala’o iha Centro São João de Deus-Laclubar, Munisípiu Manatuto, Loron Kuarta-Feira (27/11/2019).

Iha entervista, Diretór CAS, Pe. José Manuel Leonardo Machado hateten, centro ida ne’e existe atu fó atendimentu no trata ba ema ne’ebé ho problema mental, centro ida ne’e mós nakloke ba pasientes hotu-hotu iha Timor-Leste laran tomak, tamba la iha Instituisaun ida ne’ebé trata no kuidadu ba ema ne’ebé mak ho moras mental. Centro ida ne’e hetan apoiu hosi MSSI no Ministériu Saúde hodi bele garante atividades centro ida ne’e rasik. Tuir nia (Diretór CAS-red), karik la iha apoiu hosi MSSI centro ida ne’e ninia atividades sei la la’o ho di’ak, tamba ne’e nia agradese ba Governu Timor-Leste, liu hosi MSSI ne’ebé mak fó ona apoiu ba sira.

“Hosi Janeiru to’o agora ami hetan pasiente hamutuk nain 50 no iha pasientes nain 8 mak hetan ona alta”, dehan Pe. José.

MSSI fó ona apoiu desde tinan 2012 to’o agora, ba tinan 2019 rasik, MSSI fó apoiu orsamentu hamutuk $. 60.421,00. Orsamenu ida ne’e uza hodi selu saláriu colaboradores, alimentasaun, manutensaun uma, eletrisidade no buat hotu-hotu ne’ebé centro presija. Alende MSSI iha mós apoiu Aimoruk ne’ebé mai hosi Ministériu Saúde no hetan apoiu hosi Provinsia Portugal (irmãos são João de deus).

Difikuldades ne’ebé centro enfrenta mak menus aimoruk, falta transporte atu bele lori pasientes mai iha centro no reintegra fali ba iha nia familia wainhira pasientes rekopera fila fali, problema manutensaun ba uma no eletrisidade, fatin enternamentu ne’ebé ho espasu ki’ik liu nomós falta alimentasaun. Tuir nia (Diretór-red) orsamentu ne’ebé mak MSSI fó seidauk adekuadu atu bele atende ba nesesidades ne’ebé mak centro iha.

Agradase ba MSSI, tamba bele fó ona apoiu mai iha centro ida ne’e, mesmu ki’ik maibe karik la iha apoiu hosi MSSI centro ida ne’e ami labele fó assisténsia no atendimentu ba pasiente sira, husu atu iha tinan oin-2020, MSSI bele aumenta tan orsamentu atu nune’e bele fasilita ba centro ida ne’e hodi bele halo atendimentu ba pasiente sira ho di’ak liu tan, katak Pe. José Manuel Leonardo Machado.

Hatan ba difikuldadaes ne’ebé CAS hasoru, Diretór Sentru Solidariedade Sosiál Munisípiu Manatuto-SSSMM, Reinaldo Soares hateten, Bazeia ba proposta ne’ebé mak CAS hato’o mai iha SSSMM liga ba alimentasaun, ami koordena ona ho nível nasionál para fó solusaun, maibe to’o agora seidauk iha resposta i ami tenta nafatin atu fó solusaun, tamba hosi nasionál seidauk karega armajen munisipiu nian no dadaun ne’e armajen SSSMM la sufisiente atu bele fó resposta ba Instituisaun Centro São João de Deus.

Importante mak liña koordenasaun entre SSSMM rasik ho nível nasionál inklui Instituisaun Centro São João de Deus atu ita labele iha desentendementu ba ita nia problema sira ne’ebé ita enfrenta, esplika Reinaldo,

Bazeia ba orsamentu ne’ebé aloka mai iha CSSMM iha item tolu, primeiru mak liga ba formasaun profisionais, despesas operasionais nomós outrus servisus diversus nian, hosi item tolu ne’ebé mak iha iha 4 trimestral ne’e ami planu hela atu bele halo programa balun iha postu administrative, liga ba servisu atendimentu públiku ne’ebé bain-bain CSSMM hala’o, liu-liu atu halo sosializasaun ba servisu BBJ ninian, protesaun labarik, BDM inklui mós Idosos no Invalides ninian.

Comments Closed

Comments are closed. You will not be able to post a comment in this post.