Presidente Repúblika Timor- Leste, Francisco Guterres “Lu Olo” hamutuk ho Membrus Governu inklui Membrus Parlamentu sira hala’o diálogu ho komunidade Munisípiu Lautem

Presidente Repúblika Timor- Leste, Francisco Guterres “Lu Olo” hamutuk ho Membrus Governu inklui Membrus Parlamentu sira hala’o diálogu ho komunidade Munisípiu Lautem. Tema ba diálogu refere mak “Ho Diálogu Sei Hetan Solusaun Ba Problema Ne’ebé Deit, Ita Persiza Rekoñese Ida-Idak Nia Matenek, Kualidade No Kontribuisaun”. Diálogu ida ne’e hala’o iha Lospalos, Loron Sexta-Feira, (11/10/2019).

Iha okaziaun ne’e, Presidente Repúblika hateten, objetivu hosi diálogu ida ne’e atu rona diretamente komunidade sira nia hanoin no preokupasoens, liu-liu komunidade sira iha Munisípiu Lautem ne’ebé liga ho difikuldades ba vida moris komunidade sira nian mak hanesan, Problema Sosiál, Edukasaun, Agrikultura, Saúde, nsst, hodi Presidente bele kanaliza ba Governu ne’ebé mak sai hanesan exekutivu atu bele fó solusaun ba problema sira ne’ebé mak komunidade enfrenta.

Prekupasaun ne’ebé komunidade hato’o ba servisu Ministériu Solidariedade Sosiál no Inkluzaun-MSSI nian liga ba baze dadus ne’ebé mak sentraliza iha nasionál no fó impaktu atendimentu ba iha komunidade sira, tamba tenki hein kleur hodi bele hetan ninia resposta. hatan ba preokupasaun ida ne’e, dehan Vise-Ministra, Signi Verdial, ita presiza desentraliza baze dadus ba iha munisípiu, tamba ne’e iha tinan 2019 ita hahu instala ona lina internet iha sentru Solidariedade Sosiál Munisípiu hotu-hotu inklui munisípiu Lautem para bele fasilita di’ak liu tan ita nia tékniku sira iha Munisípiu hodi haruka dadus ne’e liu hosi internet deit, la presiza ona ba mai Díli, la gasta osan, tempu inklui kustu ba trasporte.

Iha okazian ne’e, Vise-Ministra mós hato’o, MSSI resolve ona problema importante ida mak sertifikadu erdeiru, uluk presiza tempu no kustu barak atu halo sertifikadu erdeiru, maibé agora MSSI muda ona akordu ne’e ho Banku Nasionál Comercio Timor-Leste-BNCTL katak, Xefe Suku sira halo deit deklarasaun no hetan konhesimentu hosi administradór sira, ida ne’e naton ona hodi benefísiariu sira bele ba banku hodi hetan sira nia direitu.

Ba oin MSSI sei melhora di’ak liu tan ninia servisu hodi atende ba iha komunidade sira, liu-liu ba komunidade sira iha área rurais, dehan Vise-Ministra MSSI.

Partisipa iha diálogu ida ne’e mak hanesan, Embaxadores, Administradór Munisípiu no Postus, Xefe Suku nomós Xefe Aldeia sira, Sosiedade Sívil, Representante Reliziosa, Veteranus, Funsionárius Públiku inklui komunidade iha Munisípiu refere.

Comments Closed

Comments are closed. You will not be able to post a comment in this post.