Ministra Solidariedade Sosiál no Inkluzaun, Armanda Berta dos Santos hamutuk ho Care International hala’o Komemorasaun Loron Mundial ba Feto Rural iha Aldeia Lepa

Ministériu Solidariedade Sosiál no Inkluzaun-MSSI, liu hosi Ministra Solidariedade Sosiál no Inkluzaun, Armanda Berta dos Santos hamutuk ho Care International hala’o Komemorasaun Loron Mundial ba Feto Rural iha Aldeia Lepa, Suku Leotola, Postu Administrativu Liquisa, Munisípiu Liquisa, Loron Kinta-Feira, (17/10/2019).

loron espesial ba feto rural ida ne’e lolos monu iha Loron 15 fulan Outubru, maibé iha tinan ida ne’e Timor-Leste, liu hosi MSSI hamutuk ho Care International komemora iha loron 17 Outubru 2019. Komemorasaun ida ne’e hala’o iha Aldeia Lepa, Suku Leotola tamba konsidera hanesan área rural.  

hafoin komemorasaun, Ministra Solidariedade Sosiál no Inkluzaun, Armanda Berta dos Santos hato’o parabéns ba feto sira ne’ebé hela iha área rurais iha Timor-Leste tomak, liu-liu iha Suku Leotola. Ba oin Ministériu persiza haree di’ak liu tan feto rural sira, liu-liu oinsá bele assesu ba iha Saúde, Edukasaun, polítika no vida ekonómia nomós assesu ba informasaun, tamba ne’e Ministériu sei servisu hamutuk ho Ministériu relevante sira hodi bele tau matan ba maluk feto sira nomós labarik feto sira iha área rural.

“Iha tempu resisténsia, feto rural mós kontribui maka’as ba ita nia independénsia, tamba ne’e mak presiza nafatin suporta no mutiva sira hodi bele involve sira iha setores oin-oin para sira mós bele iha partisipasaun másimu ba dezenvolvimentu Timor-Leste nian”, dehan Ministra.

Nune’e mós, Xefe Suku Leotola, Manuel da Silva dos Santos esplika, “Problema ne’ebé mak durante ne’e akontese ba ita nia feto sira iha suku ida ne’e mak, problema violénsia seksual, violénsia doméstika, maibé durante ne’e ami resolve tuir ami nia kbi’it rasik ho kompetensia ne’ebé mak ami iha no buat ne’ebé mak ami la bele resolve iha nível suku ami prosesa tuir lei ne’ebé mak vigor”.

Xefe Suku Leotola, husu mós ba ministériu kompetente atu bele kria lei ida ne’ebé mak di’ak no implementa ho másimu atu nune’e ita bele redus problema hirak ne’e iha komunidade sira nia le’et. Tuir Xefe Suku, problema hirak ne’e akontese iha komunidade, tamba kauza hosi problema sosiál sira seluk mak hanesan, ekonómia família fraku, komunidade la assesu ba bee moos, nsst.

Iha fatin hanesan, Martina Martins hanesan Inan feto ida iha Suku refere hato’o nia sentimentu kontente, tamba loron espesial ba feto rural ida ne’e bele komemora iha sira nia Aldeia (red. Aldeia Lepa), maibé nia nafatin triste tamba iha suku refere komunidade balun seidauk assesu ba eletrisidade, bee moos inklui Estrada, nune’e husu ba governu atu tau matan ba sira nia problema hirak ne’e.

Iha okaziaun ne’e, MSSI mós fó apoiu foos saka 50 ba komunidade sira ho kategoria vulneravel ba suku refere ne’ebé simbolikamente entrega hosi Ministra Solidariedade Sosiál no Inkluzaun. Iha oportunidade hanesan pessoal saúde hala’o mós tratamentu saúde ba inan feto sira ne’ebé persiza tratamentu.

Partisipa iha komemorasaun loron mundial ba feto rural ida ne’e mak hanesan, Representante Administradór Munisípiu Liquisa, Administradór Postu Liquisa, Komandante PNTL Munisípiu Liquisa, Xefe Gabinete Ministra Solidariedade Sosiál no Inkluzaun, Diretóra Sentru Solidariedade Sosiál Munisípiu Liquisa, Xefe Departamentu Protesaun Sosiál ba Feto-MSSI, Ministériu Saúde, Lider komunitária inklui komunidade iha fatin refere.

Comments Closed

Comments are closed. You will not be able to post a comment in this post.