Vizita Imediatamente Ba Fatin Inséndio Ne’ebé Akontese Iha Aldeia 03

Ministra Solidariedade Sosiál no Inkluzaun, Armanda Berta dos Santos, Sekretáriu Estadu Protesaun Sívil, Alexandrino de Araújo hamutuk ho Membrus Parlamentu hala’o vizita imediatamente ba fatin inséndio ne’ebé akontese iha Aldeia 03, Suku Fatuhada, Postu Administrativu Dom Aleixo, Munisípiu Díli, iha loron Segunda-Feira (09/12/2019).

Objetivu hosi vizita ne’e atu haree diretamente ba fatin akontesimentu dezastre ne’ebé mak akontese hodi  fó mós apoiu emerjénsia ba vítima inséndio refere.

Iha oportunidade ne’e, Ministra Solidariedade Sosiál no Inkluzaun, Armanda Berta dos Santos hateten, “dezastre ita hotu-hotu la espera, maibé governu mós sei la taka matan ba ninia komunidade sira ne’ebé mak afeta husi dezastre, ohin ami mai ho apoiu emerjénsia atu bele fó ba vítima inséndio sira, maibé kona-ba apoiu material konstrusaun MSSI sei servisu hamutuk ho Líder Komunitáriu sira no Sekretáriu Protesaun Sívil nomós Munisípiu Díli para bele identifika lolos família sira ne’ebé mak afeta insendio ida ne’e no merese duni atu hetan apoiu hosi Governu”.

Nune’e mós Sekretáriu Estadu ba Protesaun Sívil, Alexandrino de Araújo hateten, Governu iha responsabilidade atu fó atensaun ba iha povu ne’ebé mak afeta ba dezastre inséndio ida ne’e. Ohin Ministériu Solidariedade Sosiál no Inkluzaun hamutuk ho Sekretáriu Estadu Protesaun Sívil fó apoiu sasan emerjénsia ida ne’e no hakarak solidário sofremente ne’ebé mak komunidade sira hasoru, espera katak ho apoiu emerjénsia ida ne’e bele hamenus no hakman netik sofrementu ne’ebé mak vítima sira enfrenta.

Sasan hirak ne’e mak hanesan fo’os, lona, sasan dapur nian, nsst. Apoiu ida ne’e konsidera hanesan apoiu emerjénsia, maibé ba oin oinsá atu haree fali rekonstrusaun no Governu sei haree dadus ne’ebé mak sei fornese hosi líder komunitária sira. Dehan Sekretáriu Estadu, la bele haree nia mai hosi ne’ebé, maibé importante mak nia ema timor-oan ne’ebé mak sai vítima ba dezastre inséndio ida ne’e.

Entertantu, Xefe Aldeia 03, Suku Fatuhada hato’o kronologia isendio ne’e katak, akontesimentu ahi han uma iha tuku 11.45 OTL, tamba sirkuit eletrisidade, hosi inséndio refere komunidade hamutuk 79 familias ne’ebé mak sai vítima. Dehan Xefe Aldeia, vítima inséndio la konsege salva sira nia sasan uma laran, tamba ne’e nia husu atu Governu bele tau matan ba sira, la’os deit sasan emerjénsia maibé mós ba material konstrusaun hodi sira bele rekonstrui fila fali sira nia uma.

Comment's