Ministériu Solidariedade Sosiál no Inkluzaun-MSSI hamutuk ho Gabinete Primeiru Ministru ba asuntu sosiedade sívil hala’o monitorizasaun ba Instituisaun Solidariedade Sosiál-ISS iha Munisípiu Lautem

Ekipa kompostu hosi Ministériu Solidariedade Sosiál no Inkluzaun-MSSI hamutuk ho Gabinete Primeiru Ministru ba asuntu sosiedade sívil hala’o monitorizasaun ba Instituisaun Solidariedade Sosiál-ISS iha Munisípiu Lautem. Atividade refere hahu hala’o iha Loron Tersa-Feira to’o Kuarta-Feira, (01-02/10/2019).

Monitorizasaun ida ne’e ho objetivu atu haree direita ba ejekusaun orsamentu no programa ne’ebé mak hala’o hosi Instituisaun Solidariedade Sosiál-ISS iha Munisípiu Lautem mak hanesan, Orfonatu São João Bosco Lospalos, Kolégiu Santa Madalena de Canosa, ONG Luzeiro inklui Sentru Sosiál Imaculada Conceição Lautém, instituisaun hirak ne’e mak hatutan servisu MSSI nian ba iha komunidade no hala’o ona assina akordu ho MSSI i hetan ona apoiu osan hosi MSSI iha tinan 2019. Atividade monitorizasaun ida ne’e sei kontinua hala’o ba ISS 35 ne’ebé mak hala’o ona assina akordu.

Hafoin hala’o monitorizasaun, Xefe Departamentu Protesaun Sosiál ba Feto, Maria José Gusmão dos Reis hateten, atividade monitorizasaun ida ne’e kontinuasaun servisu hosi ekipa avaliasaun ba proposta ISS ba tinan 2019 ne’ebé hala’o ona assina akordu no ISS hirak ne’e hetan ona orsamentu hosi MSSI, tamba ne’e ekipa mai hala’o monitorizasaun ba ninia ejekusaun orsamentu  ligadu ho programa ne’ebé mak iha ona akordu nia laran.

Ekipa mós hakarak haree direitamente ISS sira ninia ejekusaun orsamentu hodi bele asegura no tuir nafatin regras hosi Ministériu Finansas nian no haree atividades saida mak sira hala’o ona no oinsa nia progresu nomós fó nafatin hanoin ba sira atu iha prosesu implementasaun programa bele hala’o di’ak liu tan no bele atinji metas sira ne’ebé mak trasa ona iha akordu.

Entertantu, hosi parte Gabinete Primeiru Ministru ba Sosiedade Sívil, Edfim Duarte S. Noronha hateten, Estadu valoriza ona papél sosiedade sívil iha Timor laran tomak inklui kongregasoens religiosos hanesan Orfonatus, Kolegio ho parseirus sira hanesan ne’e atu kompleta malu di’ak liu tan, tamba ho ISS sira nia partisipasaun ita bele atinji objetivu dezenvolvimentu sustentável-ODS.

Papel ISS importante tebes, tamba wainhira governu mesak la konsege tau matan atu haree ba problema sosiais ne’ebé mak ita nia komunidade sira enfrenta, maibé ho sira nia partisipasaun ne’e bele tulun no kompleta buat balun ne’ebé mak estadu seidauk bele halo.     

Tuir ekipa haree katak ejekusaun programa no orsamentu ISS iha Munisípiu Lautem la’o tuir mata dalan ne’ebé mak iha, maibé iha buat balun persiza hadia atu nune’e implementasaun programa ne’ebé mak iha bele la’o di’ak no bele fó benefísiu ne’ebé mak positivu ba ita nia komunidade nomós bele atinji objetivu ne’ebé mak trasa ona iha akordu ne’ebé mak assina ona.

Husu atu Asegura nafatin Komunikasaun ne’ebé mak di’ak entre MSSI no ISS nomós hala’o nafatin monitorizasaun nune’e bele garantia kualidade ejekusaun orsamentu no implementasaun programa bele la’o di’ak liu tan, dehan Edfim.

Nune’e mós, Diretór Organizasaun Naun Govermental-ONG Luzeiro, Abel da Costa esplika, Luzeiro hanesan ONG ida ne’ebé mak fó asisténsia ba vítima feto no labarik sira, hala’o programa violénsia bazeia ba jéneru no violénsia domestika nomós edukasaun sívika ba komunidade sira.

Hahu iha tinan 2012 ONG ida ne’e hetan ona apoiu hosi parte MSSI no iha tinan 2019 rasik Ministériu kontinua nafatin apoiu orsamentu ho montante $. 23 mill i tal hodi finansia ba atividades ne’ebé mak durante ne’e NGO hala’o  mak hanesan, Asisténsia Vítima ba feto no labarik sira iha uma mahon, akompaña vítima sira ba iha tribunal no hala’o monitorizasaun ba vítima sira hodi entrega ba nia família sira.

Iha tinan 2019, NGO Luzeiro rasik atende ona 27 kazu, ho ninia Tipu kazu mak hanesan, violénsia domestika hamutuk nain 11, violénsia seksual nain 6, violasaun seksual ba minoridade nain 4, no kazu abandona ba labarik nain 3. Hosi númeru ne’ebé mak iha ema nain 24 mak ONG reintrega ona ba iha nia família i nain 3 mak sei iha uma mahon hodi hein ninia prosesu.

Obstaklu ne’ebé mak NGO ne’e infrenta mak hanesan, transporte hodi  lori vítima sira ba tribunal no reintegra vítima ba iha fámilia sira, kona-ba rekursus humanus NGO sei limitadu teb-tebes atu asegura programa no atividade ne’ebé NGO ne’e iha, informa Diretór Luzeiro.

Comment's