MSSI Hala’o Konsultasaun Pan Ba Ema Ho Defisiénsia Iha Rejionál Baucau

Depois Komemorasaun Loron Mundial ba ema ho Defisiénsia iha loron 03/12/2019, Ministériu Solidariedade Sosiál no Inkluzaun-MSSI hamutuk ho Assosiasaun Defisientes Timor-Leste (ADTL) kontinua hala’o konsultasaun ba esbosu Planu Asaun Nasionál-PAN ba ema ho defisiénsia periodu 2020-2024 iha Rejionál Baucau. Atividade refere hala’o iha Sentru Konvensaun Baucau, Loron Kinta-Feira (05/12/2019).

Antes ne’e, Atividade konsultasaun PAN ba ema ho defisiénsia hala’o ona iha nível nasionál no kontinua ba nível rejionál mak hanesan Liquiça, Manufahi inklui RAEOA no Konsultasaun iha nível rejionál ba parte leste ne’ebé hala’o iha Munisípiu Baucau no involve Munisípiu 3 mak hanesan, Manatuto, Lautem no Viqueque, sai hanesan ikus ba programa konsultasaun PAN ba ema ho defisiénsia.

objetivu hosi atividade ne’e mak hodi tau hanoin hamutuk atu difine  programas prioridades no asegura ninia orsamentu rasik, liu-liu liga ba kna’ar Ministériu ida-idak nian ba asuntu defisiénsia, nune’e bele atinji objetivu dezenvolvimentu sustentável katak “ la husik ema ida iha kotuk ”. Program konsultasaun PAN ba ema ho defisiénsia ne’e hetan apoiu hosi Governu Australia hodi bele fó asisténsia no asessibilidade ba ema ho difisiénsia iha Timor-Leste ne’ebé ho númiru defisientes hamutuk nain 38.118 hosi populasaun Timor-Leste.

hafoin abertura, Presidente Autoridade Munisípiu Baucau, António Guterres hateten, programa konsultasaun PAN ba ema ho defisiénsia ida ne’e importante tebes tamba bele kompartilha ideias hosi parte hotu-hotu atu bele identifika difikuldades no nesesidades hotu hodi tau iha PAN ne’e rasik, maibé nia mós husu atu kompila ho seitores hotu-hotu nia metas ne’ebé liga ba nesesidades ema ho defisientes ninian nune’e bele assegura Programa no orsamentu inkluziva ba ema ho defisientes nomós bele atinji objetivu dezenvolvimentu sustentável.

Nune’e mós, Diretór Sentru Solidariedade Sosiál Munisípiu Baucau, Guido Ricardo Belo hateten, objetivu prinsipal hosi konsultasaun ne’e mak oinsá bele tau ideias ruma hodi bele dezeña PAN ne’e iha sensível ba ema ho defisiénsia, fó mós oportunidade ba sira atu bele hato’o sira nia hanoin no hakarak nomós nesesidades ne’ebé persiza tau mós iha PAN ba ema ho defisiénsia.

Guido esplika liu tan, karik iha futuru liñas setorais ida-idak iha Munisípius 4 ne’e, atu dezenvolve sira nia planu asaun anual no planu estratéjiku, bele hanoin ona nesesidades ba ema ho defisiénsia sira nian, ezemplu mak Obras Públika wainhira atu halo uma ida tenke hanoin ona asesibilidade ba ema ho defisientes sira nian hodi nune’e la bele husik ema ida iha kotuk. Fiar katak ho konsultasaun ida ne’e bele dezeña PAN ne’e ho estratéjiku no sensível ona ba ema ho defisientes sira.

Atividade refere ofisialmente loke hosi Presidente Autoridade Munisípiu Baucau, António Guterres no hetan partisipasaun hosi, Administradores Munisípius, Representante Governu Australia, Diretór Nasionál no Xefe Departamentu ba Asuntu Defisientes, Komandante PNTL Munisípiu Baucau inklui Sosiedade Sívil.

Comments Closed

Comments are closed. You will not be able to post a comment in this post.