DIRETORES SENTRU SOLIDARIEDADE SOSIAL

Diretór Centro Solidariedade Sosial-CSS Munisipiu Baucau

Diretór Centru Solidariedade Sosiál Baucau

Guido Ricardo Belo

Diretór Guido Ricardo Belo, oan primeiru hosi aman Manuel Ricardo Belo (matebian) ho inan Rosa Belo. Tanba inspira hosi liafuan “karidade hanesan exame konsiénsia humanu hodi servi maluk ne’ebé iha problema sosiais” nune’e Sr. deside Guido hanoin atu oferese no dedika’an hodi sai servidór estadu iha área sosiál.

Diretór Guido, remata nia eskola Sekundária iha SMPS Dili, tinan 1993, kontinua estudu iha Sekolah Tinggi Kesejahteraan Sosiál 1998, no iha tinan 2001 halo estudu Universidade Padjadjaran Bandung, no ikus, iha tinan 2009, hetan Majestradu iha Universidade Gadjah Mada-Indonesia, fakuldade Administrasaun Públiku.

Iha tempu okupasaun, maske prekupadu hanesan estudante ida, Guido mós involve-an iha organizasaun klandestina no organizasaun massa hanesan sai Sekretáriu IMPETTU Bandung no sai militante RENETIL.

Esperiénsia servisu hahú iha tinan 1999, hodi sai hanesan Vise Diretór Eskola SMAN I Baucau. Sai Koordenadór Jerál ba Rede Protesaun Labarik iha Timor-Leste no Servisu Traballadór Kriansas iha DNRS, tinan 2004. Iha tinan 2010 hetan fiar hodi sai hanesan Xefe Departamentu Sentru Rejionál Oecusse, no ikus iha tinan 2013 kaer kargu nu’udar Diretór Distrtál Oecusse.

Atu hasa’e liutan kapasidade profesionál nian, Diretór Guido tuir ona seminárius, treinamentus, estudus komaprativus no formasoins oi-oin. Nune’e mós fasilita treinamentu no sai panel team ba telekonference interview iha kompaun UNFPA nian. iha mandatu VI Governo RDTL hetan fiar hodi asumi kargu foun nudar Diretór Centru Solidariedade Sosiál Baucau.

Diretór Centro Solidariedade Sosiál-CSS Munisipiu Maliana

Diretór Acacio Gonçalves, Lc.E

Moris iha Bobonaro loron 21 Maiu 1970. Tama eskola primária iha eskola SDN 01 Maliana, eskola Pre-Sekundária SMP Kolejiu Infantre Sagres Maliana, no ensinu sekundária iha eskola Santo Petrus Dili. Hafoin remata iha eskola sekundária refere, iha tinan 2008 kontinua eskola iha Institute Of Bussinis, Dili, no remata iha tinan 2012.

Seluk hosi edukasaun formál, Diretór ne’e mós tuir formasaun lubuk ida, hanesan tuir treinamentu iha STTPL, Denpasar Bali-Indonesia, treinamentu Administrasaun hodi Jere Osan Funsionáriu nian, Kursu Báziku Governasaun Lokál, Treinamentu kona-ba The Basics Actuary Sosiál Insurance System, no tuir mós Leadership Training iha Executive School “YES”, iha Yogyakarta-Indonesia.

Iha parte esperiénsia servisu, iha tinan 1993 to’o 1995, Diretór Acacio servisu kedas iha tempu okupasaun Indonesia, iha PEMDA TK. II Ermera, ho pozisaun hanesan staf Planeamentu Programa. Iha tinan 1995 to’o 1999 haknaar fali iha PEMDA TK. II Bobonaro, hanesan Asistente Finansas. Hafoin Ukun-An, servisu iha World Vision hanesan Manajer Lojístika, iha tinan 2000 to’o 2002. Hosi World Vision, haknaar fali iha District Finance Officer (DFO) iha NGO Moris Rasik (fo kreditu). Iha tinan 2007 to’o 2015, sai hanesna Pontu Fokál Seguransa Sosiál iha CRSS Bobonaro. Ho prestasaun servisu ne’ebé nia iha, ikus mai, iha tinan 2015, hetan fiar hodi kaer kargu hanesan Diretór Rejionál Bobonaro.

Diretór Centro Solidariedade Sosiál-CSS Munisipiu Ermera

João Bosco de Jesus Mendonça

Moris iha Dili, loron 24 Julho 1961. Remata nia escola sekundária iha Externato São José Balide-Dili, tinan 1975, hetan Sertifikadu Kursu Jeral Liceu, tinan 1997. Hafoin remata kontinua estuda iha Universidade Nasionál Timor-Leste (UNTL), tinan 1988-1991, iha fakuldade Siênsias Sosiais/Administrasaun Públika-inkompletu.

Esperiensia servisu hahú tempu Indonesia, iha Administrasaun Governu Indonesia-Pemda TK I Timor-Timur, tinan 1989-1999. Tempu ukun-an kontinua servisu iha Sekretáriadu Tékniku Administrasaun Eleitoral-STAE nuda’ar responsável Centro Votasaun iha Dili ba eleisaun Membrus Asembleia Konstituante no Eleisaun Primeiru Presidente RDTL, tinan 2001-2002. Hahú servisu iha Ministériu Solidariedade sosiál-MSS, hodi sai hanesan, Assistente Administrasaun no Jestaun Rekursus Humanus-MSS, iha tinan 2004-2006, Asistente Servisus ba Apoiu Centru Rejionais no Distritais-MSS, iha tinan 2006-2008.

Iha tinan 2008-2014, hetan nomeasaun hodi kaer kargu hanesan Xefe Departamentu Komunikasaun i Informasaun Teknolójia-MSS, ho esperiensia servisus ne’ebé mak iha ikus mai hetan tan fiar hodi asumi kargu hanesan Diretór Centru Solidariedade Sosiál-CSS Munisipiu Ermera, iha tinan 2015 to’o agora.

Diretór Centro Solidariedade Sosiál-CSS Munisipiu Manufahi

Diretór Centro Solidariedade Sosiál-CSS Munisipiu Manatuto

Diretór Centru Solidariedade Sosiál Manatuto

Gaspar Martins

Moris iha Uato-Carbau, Distritu Viqueque loron 7 Fevereiru 1966. Hahú tama eskola iha Ensinu Primária Uatu-Carbau tinan 1979. Kontinua ensinu Pré-Sekundária iha eskola Paulus VI Dili, tinan 1984, ensinu Sekundária Ekonomia Dili 1987, no Ensinu Superiór Universidade Díli iha Departamentu Administrasaun Públiku tinan 1996.

Atu hasa’e kapasidade pesoál, Diretór Martins tuir kursu oi-oin. Iha kursu Administrasaun Seguransa Sosiál, Jestaun Lideransa, treinamentu hasa’e kapasidade profesionál iha área Development Program of Child Welfare Protection, ToT Life Skill Based Education, Jestaun Dezastres no treinamentu média.

Iha tinan 2000, hahú servisu hanesan staf temporáriu UNTAET nian, no iha tinan hanesan servisu nu’udar profesór ensinu iha eskola Sekundária Canossa-Dili. Iha tinan 2003 muda hodi sai funsionáriu SETS, MTRC no MSS.

Iha tinan 2010, hetan nomeasaun hodi kaer kargu hanesan Xefe Departamentu Sentru Rejionál Manatuto & Dili, no iha 2013 hetan fiar hodi assume kargu nudar Diresaun Distritál Manatuto hanesan Diretór iha distritu refere. iha mandatu VI Governo RDTL hetan fiar hodi asumi kargu foun nudar Diretór Centru Solidariedade Sosiál Manatuto.

Diretór Centro Solidariedade Sosiál-CSS Munisipiu Liquiça

Sérgio Elidio Borges de Deus

Moris iha Dili, iha loron 24 Fevereiru 1969. Hahú tama eskola iha SDN X Bairo Pite iha tinan 1978, eskola pré-sekundária iha SMPN 2 Comoro Dili,1984 no eskola sekundária iha SMAN 2 Dili, tinan 1987. Hafoin remata iha sekundária kontinua estudu iha Universidade Nasonál Timor-Leste (UNTL) tinan 2007, iha fakuldade Ekonomia. Hetan tiha lisensiatura iha UNTL, Diretór ne’e kontinua estudu maestradu iha fakuldade Administrasaun Públiku, Universidade da Paz, iha tinan 2012.

Esperiénsia servisu hahú kedas tempu Indonesia, iha Dinas Sosiál-Sub Bagian Kepegawaian tinan 1991 no Sub Dinas Rehabilitasi Pelayanan Sosiál, tinan 1996. No iha era Ukun Rasik-an, nafatin dedika’an iha área sosiál, hodi sai hanesan Sekretáriu Presidium Juventude Lorico Assu-wain, Konsellu Nasionál Juventude Timor-Leste, Komisáriu Rejiaun Oeste ba Komisaun Diálogu Reinsersaun Komunitáriu (CDRC), Diálogu Programa Simu Malu, Gabinete Kooperasaun, no haknaar iha Gabinete Diretór-Jerál. Ho esperiénsia servisus, esperiénsia organizasaun ne’ebé nia iha, no atu hasa’e liutan kapasidade pesoál iha área servsus sosias nian, Sr. Sérgio atende kursus, formasoins, no seminárius oin-oin, ne’ebé lori nia ba kaer kargu hanesan Diretór Rejionál, ikus Iha tinan 2016 hetan tan fiar hodi asumi responsabilidade hanesan Diretór Centru Solidariedade Sosiál Liquiça.

Diretór Centro Solidariedade Sosiál-CSS Munisipiu Covalima

Dr. Amandio Amaral Freitas

Moris iha Fatuisin-Suai, 2 Marsu 1971. Hahú eskola primária iha SDN 1 Zumalai-Suai, pré-primária SMPN-1 Suai, sekundária SMAN-II, Dili. Hafoin ida ne’e, kontinua estudu iha Sekolah Tinggi Pemerintahan Dalam Negeri-Jakarta tinan 1994 no hasai lisensiatura iha Universidade Brawijaya Malang, tinan 1999.

Esperiénsia servisu hahú hanesan funsionáriu públiku permanente iha tempu Indonesia, nu’udar staf BANGDES TK.I. Dili, iha tinan 1991 to’o 1999. Hafoin Referendum 1999, haknaar hanesan staf Administrasaun UNHCR no kontinua hanesan staf lokál UNTAET iha tinan hanesan. Iha 2001 sai funsionáriu ETTA, hafoin iha krize militár 2006, hetan fiar hodi koordena reintegrasaun IDP’s iha Programa Hamutuk Harii Futuru, ne’ebé hetan fiar hodi sai Diretór DNAS no iha mandatu VI Governo RDTL hetan fiar hodi asumi kargu foun nudar Diretór Centru Solidariedade Sosiál Covalima.

Diretór Centro Solidariedade Sosiál-CSS Munisipiu Ainaro

Jemmy Valente de Orleans dos Reis

Moris iha Manutasi-Ainaro, iha loron 22 Marsu 1977. Tama eskola primária iha SDN III Manutasi, tinan 1983, Pré-sekundária SMPN I Ainaro tinan 1989, no sekundária iha SMAN II Dili, 1995. Remata iha sekundária, kontinua iha Sekolah Tinggi Ilmu Pemerintahan Dalam Negeri (STPDN), Bandung-Indonesia.

Kareira profesionál hahú kedas iha tempu Indonesia iha Sekretariat Jenderal Departemen Dalam Negeri, hodi sai hanesan funsionáriu públiku. Iha era Ukun-An, servisu hanesan ofisiál relasaun traballu, iha Ministry of Social Service no Sekretáriu Estadu Traballu & Solidariedade. Hafoin ida ne’e, hetan fiar hodi sai Koordenadór ba Sentru Rejionál Maliana no Xefe Departamentu Sentru Rejionál Oecusse. Iha tinan 2010, sai Xefe Departamentu Admnistrasaun & Jestaun Rekursus Umanus, no iha tinan 2013, hetan tan fiar hodi kaer kargu Diretór Nasionál Administrasaun & Rekursu Umanu no haree ba desentralizasaun servisu ne’ebé mak VI Governu Konstitusionál kria ona hodi estabelese Munisipius, kontinua hetan fiar hodi kaer kargu hanesan Diretór Centru Solidariedade Sosiál Ainaro.

Diretór Centro Solidariedade Sosiál-CSS Munisipiu Lautem

Diretór Centro Solidariedade Sosiál-CSS Munisipiu Viqueque

Diretór José Juvencio Soares Francisco

Moris iha Baucau, iha loron 21 Janeiru 1974. Hahú tama eskola iha SDN 1, Viqueque, eskola pre-sekundária iha SMPK Sta. Maria Gorreti, Viqueque, no eskola sekundária iha STM Dom Bosco, Fatumaca-Baucau. Hafoin remata eskola sekundária, kontinua ba ensinu superiór iha Institut Teknologi Sepuluh November (ITS), Surabaya-Indonesia, iha Departamentu Teknik Industri. Iha parte edukasaun naun formál. Diretór Juvencio tuir treinamentu iha Foundation Electrics ( Land Rover) PT. Java Motors, iha Bandung no Jakarta-Indonesia.

Esperiénsia servisu hahú iha PT. Golden Sae M&T iha Dili, hanesan Asistente Mekániku Land Rover Group, iha tinan 2000 to’o 2001. Iha tinan 2001, servisu hanesan Tékniku i Mekániku iha Konsuladu Kanada, Díli. Iha tinan hanesan, sai mós nu’udar Mekániku ba iha Embaxada Indonesia, iha Dili. Hafoin ida ne’e, servisu fali iha ONG Nasionál, ETADEP, hanesan Mekániku. No kontinua servisu hanesan mekániku iha Ministériu Trabalho Reinsersaun Sosiál (MTRC).

Iha tinan 2006 to’o 2008, servisu hanesan Responsável Lojístika, iha MTRC ho Programa Simu Malu (programa emerjénsia). Hafoin ida ne’e, sai hanesan Responsável ba Manuntensaun no Reparasaun Transporte Ministériu Solidariedade Sosiál (MSS), i sai mós hanesan Pontu Fokál ba Adminstrasaun no Finansas, iha CDSSD, Dili. Ho prestasaun servisu ne’ebé iha, ikus mai hetan fiar hodi sai hanesan Diretór Sentru Solidariedade Sosiál, Munisípiu Viqueque.

Diretór Centro Solidariedade Sosiál-CSS Munisipiu Dili

Diretór Centro Solidariedade Sosiál-CSS Munisipiu Aileu

This post is also available in: Portuguese Tetum