POVU AINARO KOMEMORA LORON RESTAURASAUN …

Ministra Solidariedade Sosiál no Inkluzaun, Armanda Berta dos Santos diriji seremónia hasa’e bandeira hodi komemora Loron Restaurasaun Independénsia Timor-Leste 20 Maiu ba dala 17, Iha Kampu Futebol, Munisípiu Ainaro, Loron Segunda-Feira, (20/05/2019).

Tema ba komemorasaun tinan ida ne’e mak “Hamutuk Fortifika Unidade, Garante Estabilidade Hodi Hala’o Dezenvolvimentu Nasionál”. Iha seremónia hasa’e bandeira refere, Ministra transmite mós diskursu Presidente Repúblika Timor-Leste, Francisco Guterres “Lo Olo” ba povo Munisípiu Ainaro.

Hafoin seremónia hasa’e bandeira, Ministra Solidariedade Sosiál no Inkluzaun, Armanda Berta dos Santos hateten, loron 20 Maiu hanesan loron espesiál teb-tebes ba povu Timor-Leste tomak, tamba nasaun ida ne’e hamrik ema barak mak mate no sakrifika sira nia-an ba luta libertasaun hodi ohin loron Timor-Leste bele sai hanesan nasaun ida independente no soberanu.

Relasiona ho mensajen Presidente Repúblika Timor-Leste, Francisco Guterres ne’ebé hateten Hamutuk hodi kombate ki’ak no mukit iha rai laran, tamba ne’e, ba futuru MSSI sei servisu hamutuk ho Ministériu relevante atu haree di’ak liu tan ba ema ne’ebé mak moris ho vulneravel. Dehan Ministra, sei iha ekipa ida mak foti dadus ba ema kbi’it laek sira atu nune’e MSSI bele fó duni apoiu ba ema ne’ebé moris ho vulneravel, nune’e sira mós bele moris hanesan sidadaun sira seluk ou labele tau ema ida iha kotuk, esplika Ministra.

Iha fatin hanesan, Administradór Munisípiu Ainaro, Albertino de Araújo hateten, Loron ohin hanesan loron importante ba povu Timor- leste, liu-liu ba Povu munisípiu Ainaro ne’ebé mak ohin loron hala’o selebrasaun ba Loron Restaurasaun Independénsia Timor-Leste Ba dala 17.

Atu priense ukun-an ida ne’e, Munisípiu Ainaro iha ona Planu prioridades ba tinan ida ne’e, “ami prepara no elabora planu lubuk ida ne’ebé hato’o ona ba Ministériu Estatal para prevé orsamentu hodi bele realiza ba planu ne’ebé mak iha ona, planu hirak ne’e mak hanesan dezenvolvimentu infra-estrutura bázika no jestaun turismo. Iha projeitu tipu oin tolu mak hanesan, grande projeitu, projeitu PNDS no PDN, nune’e ba futuru atu haree mós jestaun turismu ba Munisípiu Ainaro rasik ne’ebé mak iha potensia bo’ot teb-tebes atu bele fó reseitas mós ba ami, hanesan turismu natural, kultural, turismu ba resisténsia ninian no turismu relijioza hodi munisípiu bele jere, maibe ami hein atu governu sentral bele desentraliza mai, tamba ida ne’e mak sei fó reseitas ba munisípiu atu bele dezenvolve di’ak liu tan iha futuru”, dehan Administradór Munisípiu Ainaro.

Hafoin seremónia hasa’e bandeira Ministra hamutuk ho Autoridades Munisípiu, Liñas Setorais Munisípiu Ainaro, PNTL, F-FDTL, Veteranus, Estudantes, Líder komunitárius inklui komunidades tau ai-funan ba restus mortais sira ne’ebé iha ona Ossuariu nomós tau ai-funan iha Jakarta II hodi hanoin hika’as fali maluk sira ne’ebé mate ba libertasaun ida ne’e. Aleinde ne’e, komemorasaun Loron Restaurasaun Independensia ba tinan ida ne’e, munisípiu Ainaro realiza mós atividade desportu balun ho objetivu hodi anima komunidade, liu-liu komunidade munisípiu Ainaro rasik.

Author: admin1