SSSMC SIMU FO’OS 100 SAKAS

Ministériu Solidariedade Sosiál no Inkluzaun-MSSI, liu husi Diresaun Nasionál Asisténsia Sosiál-DNAS entrega fo’os hamutuk 100 sakas ba Sentru Solidariedade Sosiál Munisipiu Covalima-SSSMC hodi fó apoiu ba Instituisaun Solidariedade Sosiál-ISS inklui ema vulneravel sira. Atividade ne’e hala’o iha Munisípiu Covalima Loron Sexta-Feira, (21/08/2020).

Atividade hanesan hala’o mós iha munisípiu Maliana, Lautem, Ainaro, Bobonaro, Ermera inklui minisípiu Aileu.

Iha oportunidade ne’e, Diretór Sentru Solidariedade Sosiál Munisipiu Covalima, Agapito Assis Cardoso hateten, Programa prioridade ida ne’ebé SSSMC hala’o mak hanesan  asisténsia humanitária ne’ebé  fó apoiu ba maluk vulneravel sira ne’ebé presiza aihan, liu-liu ba Instituisaun Solidariedade Sosiál-ISS, defisientes, grupu vulneravel, vítima violénsia, eis prizoneirus.

“Foos ne’ebé mak haruka mai bazeia ba nesesidade komunidade sira nian, tanba pedidu hirak ne’ebé komunidade hato’o mai, SSSMC haruka ba iha Nasionál atu oinsá bele haree, normalmente husi nasionál haruka mai kada fulan 3 ou kada fulan 6 hodi SSSMC halo distribuisaun ba komunidade sira ne’ebé presiza aihan. Wainhira fo’os to’o mai, ita nafatin servisu hamutuk ho ita nia parseirus no autoridade sira hodi halo distribuisaun, liu husi rekursu transporte ne’ebé ita iha hodi fasilita atu bele to’o lalais ba iha  komunidade sira”, dehan Diretór.

Diretór hatutan liu tan, iha primeiru to’o segundu trimestre ba tinan 2020, SSSMC fó ona apoiu ba benefisiárius 544 ho fo’os hamutuk 555 sakas ba komunidade sira, liu-liu ba ema ne’ebé vulneravel, Instituisaun Solidariedade Sosiál sira ne’ebé tau matan ba labarik sira no vítima violénsia inklui vítima dezastres naturais. Apoiu ba ISS sira ita halo ba kada trimestre, maibé ba maluk vulneravel sira hanesan defisientes, inan faluk sira depende ba sira nia nesesidades no ida ne’ebé presiza tebes atu ita halo intervensaun.

“Ba oin ita presiza defini se mak vulneravel, hodi ita bele identifika ema ne’ebé moris ho vulneravel,  nune’e nia bele hetan asisténsia husi Ministériu Solidariedade Sosiál no Inkluzaun. Dehan Diretór, dadaun ne’e, Ita nia alvu mak maluk defisientes sira, oan kiak, ita nia ferik katuas sira abandonadu, ita nia inan faluk, vítima violénsia, eis prizoneirus inklui vítima dezastres naturais sira”, katak Diretór SSSMC.

Entertantu, Xefe Departamentu Asisténsia Humanitária, Diniz da Silva hateten, iha segundu trimestral ida ne’e, DNAS distribui fo’os ba kada munisípiu 100 sakas deit, tanba fo’os ne’ebé mai husi Sentru Lojístika Nasionál (CLN-sigla Portugés) limitadu tebes. MSSI husu ba CLN hamutuk 4000 sakas, maibé husi CLN fó deit 1500 sakas, ho nune’e ba periodu ida ne’e distribuisaun fo’os hala’o deit ba munisípiu 7 mak hanesan, Munisípiu Maliana, Lautem, Ainaro, Covalima, Bobonaro, Ermera inklui Aileu, ba munisípiu sira seluk hein fali períodu tuir mai.

Comment's