MSSI FÓ APOIU SOLIDARIEDADE BA FAMÍLIA VULNERÁVEL IHA MUNISÍPIU MANATUTO

Ministériu Solidariedade Sosiál no Inkluzaun-MSSI, liu hosi Diresaun Nasionál Asisténsia Sosiál-DNAS ne’ebé servisu hamutuk ho Sentru Solidariedade Sosiál Munisípiu Manatuto-SSSMM no Lider Komunitáriu sira iha munisípiu refere hodi fó apoiu solidariedade (material konstrusaun) ba família vulnerável ida iha Munisípiu Manatuto. Atividade ne’e hala’o iha Suku Batara, Aldeia Balulin, Loron Kinta-Feira (27/08/2020).

Benefisiária (Alice Soares) ba hela iha Díli, tanba funu iha 1975 ne’ebé obriga nia tenke halai ba ai-laran hosi nia moris fatin, maibé ikus mai rende iha Díli. Durante hela iha Díli nia la iha rai atu hela no nia deside hodi hela iha Tasi Ibun-Bidau-Lecidere durante tinan barak. Ho ninia komitmentu ne’ebé forte tebes halo nia hakarak fila ba nia moris fatin Suku Batara, Aldeia Balulin, tanba ne’e, nia husu apoiu ba MSSI atu bele fasilita nia ba moris fali iha nia Aldeia rasik ne’ebé uluk nia hela bá, bazeia ba ida ne’e MSSI fó apoiu solidariedade ba nia.

Iha okaziaun ne’e, Administradór Postu Laclubar, Natalino Martins Carvalho hateten, “hau agradese ba MSSI tanba bele tau matan no fó ona apoiu solidariedade material konstrusaun ba ami nia komunidade (Alice Soares-red) ne’ebé durante tinan barak hela iha Díli- tasi ibun Bidau-Lecidere. Ami mós apresia tanba ohin governu, liu hosi MSSI bele fasilita ona hodi lori família ida ne’e mai iha nia moris fatin nomós entrega ofisialmente ba ami nudar autoridade lokal Postu Administrativu Laclubar ho kondisaun ne’ebé mak di’ak. Hau husu mós ba Xefe Suku ho ninia estrutura tomak katak, hosi prosesu ida ne’e ita tenke akompaña nafatin atu nune’e prosesu konstrusaun ba nia hela fatin bele la’o di’ak no karik ami atinji ona rezultadu ruma ami sei relata ba Diretór Sentru Solidariedade Sosiál Munisípiu Manatuto, atu nune’e Ministériu mós bele hetan informasaun husi prosesu ne’e tomak”.

Nune’e mós Xefe Departamentu Asisténsia Humanitária, Diniz da Silva esplika, Ohin MSSI mai fó apoiu solidariedade ba ita nia inan ne’ebé durante tinan barak hela iha Díli-tasi ibun Bidau (tanba la iha uma-red) no husu governu nia apoiu atu bele fasilita mai hela fali iha nia morin fatin. Apoiu solidariedade ne’ebé mak MSSI fó mak hanesan material konstrusaun, (simentu, besi, kalen, pregu, arame, nsst).  Apoiu ne’ebé mak iha tuir kbi’it governu nian, tanba governu la’os haree deit ba ema ida rua maibé haree ba ema hotu-hotu iha timor laran tomak, katak Diniz.

Iha fatin hanesan, Xefe Aldeia Balulin, Antonio do Rosario dehan, “hau agradese no apresia tebes ba esforsu governu, liu-liu MSSI tanba bele tau matan ba hau nia komunidade ne’ebé moris ho vulneravel, la’os tanba buat seluk maibé tanba funu mak hafahe ita hodi hau nia komunidade  ida ne’e ba hela iha Díli durante tinan barak, maibé governu ohin loron bele haree no fasilita ona hodi lori fila fali mai iha ne’e, ami simu ho liman rua. Hau husu mós ba komunidade Aldeia ida ne’e atu servisu hamutuk hodi halo netik fatin ida atu nune’e nia bele hamahan netik hodi bele hala’o nia moris lor-loron iha fatin ida ne’e.

Entertantu, Benefisiária, Alice Soares esplika, “Ami sai husi ne’e, tanba funu iha tinan 1975 ami halai ba ailaran no ba rende iha Díli no iha ne’eba hau hela iha uma estadu durante tinan barak, ikus mai estadu hasai hau no hau hela fali iha tasi ibun-Bidau, atividade ne’ebé mak hau halo iha tasi ibun mak tau redi iha tasi hodi buka ikan ba fa’an, hau nia oan hamutuk nain 5, nain 3 sei eskola, nain rua seluk forma ona família. Ohin loron hau mai iha ne’e ho hau nia hakarak rasik, tanba durante tinan barak hau hela deit iha tasi ibun, hau sente la di’ak, ho nune’e mak hau deside mai fali iha hau nia moris fatin, tanba hau uma la iha no toba hela iha tasi ibun. Ohin loron governu azuda ona hau ho material konstrusaun no hau sei halo fali uma ida iha hau nia moris fatin. Husu mós atu governu tau matan nafatin hau iha tinan ida nia laran, tanba hau foin mai”, dehan Alice.

Comment's