RESENSIBILIZASAUN PROGRAMA SEGURANSA SOSIÁL BA LIÑA

Ministra Solidariedade Sosiál no Inkluzaun, Armanda Berta dos Santos no Presidente Komisaun Funsaun Públika, Faustino Cardoso Gomes hala’o enkontru ho representantes rekursus humanus hosi instituisoins Governu nian, kona-ba programa resensibilizasaun seguransa sosiál, liu-liu ba rejime kontributivu seguransa sosiál, enkontru ne’e hala’o iha Edifísiu Sentral MSSI-Kaikoli-Díli, Loron Tersa-Feira, (11/09/2018).

Programa rejime kontributivu seguransa sosiál ne’e sei hala’o no implementa liu hosi Ministériu Solidariedade Sosiál no Inkluzaun-MSSI, Komisaun Funsaun Públika-KFP nomós Ministériu Finansas, tuir kna’ar no atribuisaun servisu ida-idak ninian.

Hafoin enkontru, Ministra Solidariedade Sosiál no Inkluzaun, Armanda Berta hateten, Objetivu prinsipal hosi enkontru ne’e mak atu halo efikasia ba implementasaun seguransa sosiál ne’ebé sei hahu iha fulan setembru 2018.

Ministra hatutan liu tan, seguransa sosiál ne’e kria hodi bele proteje trabalhadores sira ne’ebé hasoru risku sosiál no bele prevene ba trabalhadores sira hosi kiak atu bele hamoris aktividades ekonomia hodi bele fó moris ba funsionárius ou trabalhadores sira karik sira labele servisu ona iha futuru (reforma-red), katak Ministra.

Nune’e mós, Presidente Komisaun Funsaun Públika, Faustino Cardoso hateten, enkontru ne’e realiza atu oinsá bele atualiza polítika implementasaun seguransa sosiál ninian no hosi parte tékniku bele esplika teknikamente oinsá atu priense formuláriu deklarasaun remuneratóriu hosi instituisaun ida-idak ninian.

Presidente realsa liu tan, enkontru ida ne’e mós bele esplika ba funsionáriu sira oinsá mak bele hatur iha lista ne’ebé mai hosi funsaun públika no lista hosi instituisaun ida-idak, haree ba tipu funsionárius sira ne’ebé mak iha, tanba seguransa sosiál ne’e komprensivu katak, kobre ba funsionárius hotu-hotu, la’os deit ba funsionárius permanente, maibé ba mós funsionárius kontratadu sira.

Ba funsionárius ou trabalhadores ida-idak sei ko’a 10% ba iha ámbitu seguransa sosiál, hosi 10% ne’e empregador sei asume responsabilidade 6%, enkuantu trabalhadores sei asume responsabilidade 4% ne’ebé sei ko’a hosi ninia saláriu hosi seitór públiku no seitór privadu sira, hosi seitór públiku nia empregador mak estadu, signifika estadu ninia responsabilidade mak 6% kada fulan hodi atribui ba funsionárius públikus sira inklui funsionárius kontratadus, esplika Presidente KFP.

Partisipa iha enkontru ne’e mak, Kordenadór GJPRU, Domingas da Silva, Diretór Jéral Protesaun Sosiál, Eugéniu João A. de Maria Soares, Diretóra Nasionál Rejime Kontributivu Seguransa Sosiál, Aida Mota, Komisarius Komisaun Funsaun Públika inklui Diretores Rekursus Humanus hosi Instituisoins Governu.