SEITÓR PRIVADU FÓ APOIU BA VÍTIMA DEZASTRE NATURAIS

Iha Kuarta–Feira, loron 26/06/2013, iha Edifisiu Sentrál MSS, Caicoli-Dili, Emprezariu ou Kompañia hanesan City Auto, Grupu Consorsiu Nasionál Timor, Kompañia Volgapa, EDS, Jection Lay, Star King, Victoria (Fitun Maubara) no Kompañia Toko lay, konjuntamente fó tulun ba Vítima dezastres naturais liu hosi Sekretária Estadu Apoiu i Promosaun Seitór Privadu, Veneranda E.M. Lemos Martíns, hodi entrega ba Ministériu Solidariedade Sosiál (MSS), liu husi Ministru Exersísiu Dr. Jacinto Rigoberto Gomes de Deus, hodi distribui ba vítima dezastre sira.

Apoiu ne’ebé entrega liu hosi MSS ne’e, mak hanesan nesesidade báziku no mós osan. Kategoria nesesidades bázikus mak, fos, supermi, lona bikan, sanan, sabaun, nst. Kategoria osan mak, hosi Kompañia City Auto apoiu osan ho montante $. 2000, Grupu CNT entrega $. 35.000, Grupu Kompañia sira ne’ebé entrega sasán nesesidades báziku mak hanesan kompañia Volgapa, EDS, Jection Lay, Star King, Victoria (Fitun Maubara) no kompañia Toko Lay, sira ne’e hotu lori empresarius ka seitór privadu nasionais nia naran.

Iha oportunidade ida ne’e, Ministru Exersisiu Ministériu Solidariedade Sosiál, Dr. Jacinto Rigoberto Gomes de Deus hato’o nia sentimentu orgullu teb-tebes ho sintidu solidariedade ne’ebé mak a’as hosi emprezáriu sira, ne’ebé mak agora dadauk hatudu sira nia preukupasaun ba maluk vítima dezastres, ne’e hatudu indikasaun ne’ebé mak di’ak, hodi nune’e bele hamenus sofrementu família vítimas sira nian.

Ministru Exersisiu ne’e afirma liu tan katak, udan iha dia 21 to’o 22 (Juñu 2013-red) afeta ba famílias liu rihun ida (1000) mak lakon sira nia sasán, lakon uma, animal, no lakon sira nia toos no natar, ne’ebé fó impaktu boot ba sira iha tempu badak nomos tempu oin mai. Tanba ne’e, tuir Ministru Exersisiu, ne’ebé mós hanesan Vise Ministru MSS, katak, ho apoiu empresarius hirak ne’e, bele hakman sofrementu vítimas dezastre naturais. Apoiu hirak ne’e Ministériu sei haree atu ajuda ba fatin sira ne’ebé mak persiza tebes apoiu no ameansadu, liu-liu Distritu sira ne’ebé afeitadu ba dezastre hanesan Baucau (Seisal), Watulari (Suco Bebui), Natarbora, Welaluhu, Alas nomos iha Suai.

Iha fatin hanesan, Sekretária Estadu Apoiu i Promosaun Seitór Privadu, Veneranda E.M. Lemos Martíns hateten, nia mai hamutuk ho emprezáriu nasionais sira, atu fó mós sira nia kontribuisaun ba maluk sira ne’ebé mak hetan dezastre naturais.

Sekretária Estadu ne’e informa liu tan, apoiu ida ne’e la’ós primeira vez i seitór privadu sira fó nafatin sira nia apoiu ba saida deit, momentu ema persiza sira sempre prontu ho sira nia limitasoins nomos ho sira nia difikuldades, tanba ne’e, Sekretária Estadu sinte urgullu teb-tebes ho seitúr privadu nasionais, ne’ebé hanesan Timor-oan bele tulun malu nafatin. Sekretária Estadu ne’e mós apela ba emprezárius hotu-hotu iha Timor laran tomak, atu bele fó apoiu nafatin morál no materiál, ba sira ne’ebé mak afetadu dezastres naturais.

Iha sorin seluk, Prezidente CNT, Gorge Serano hateten, objetivu apoiu ida ne’e atu halo Kaman Governu hodi bele atende dezastre ne’ebé mak mosu, hanesan emprezáriu nasionál haree ba situasaun ida ne’e senti todan ne’ebé mak akontese ba vítima sira, tanba ne’e mak hanesan emprezáriu iha dever atu fó apoiu ruma hodi ajuda maluk sira ne’ebé mak afeita dezastre naturais.

Iha seremónia entrega apoiu ne’e, partisipa mós Direitores no Xefe Departamentus, Asesor Nasionais no Internasionais nomos Emprezárius sira.

This post is also available in: Tetum