SEMINÁRIU NASIONÁL KONA-BA DIREITU EMA HO

Ministra Solidariedade Sosiál no Inkluzaun Armanda Berta dos Santos hamutuk ho Provedória Direitus Humanus no Justisa-PDHJ, Embaixadór Australia, Representante Ajensia ONU iha Timor-Leste, Asosiasaun Defisiéntes iha Timor-Leste-ADTL inklui representantes organizasaun Defisiéntes iha Timor-Leste realiza semináriu nasionál kona-ba direitu ema ho defisiénsia. Semináriu refere hala’o iha Edifísiu Sentral MSS-Kaikoli-Díli, Loron Kinta-Feira, (13/09/2018).

Tema ba semináriu ida ne’e mak, hamutuk ita atinji sosiedade ida inkluzivu no la iha ema ida mak hela iha kotuk iha Timor-Leste.

Iha okaziaun ne’e, Ministra Solidariedade Sosiál no Inkluzaun, Armanda Berta dos Santos hateten, MSSI iha ninia polítika ba tinan lima mak hanesan halo advokasia liu hosi promosaun direitus ba ema ho defisiéntes, asegura ema ho defisiéntes, partisipa iha edukasaun inkluzivu, hametin redi parseira ho entidade relevante iha área rehabilitasaun, prevensaun ba kazu difisiéntes. Sei hala’o mós prestasaun servisu liu hosi servisu rehabilitasaun integradu komunidade iha área rurais no animasaun ba utentes ne’ebé halo tratamentu iha Centru Nasionál Rehabilitasaun-CNR Becora. Sei kontinua halo dezenvolvimentu institusionál liu hosi jestaun rekursus humanus no administrasaun, asegura funsionamentu base dadus, hametin koperasaun ho parseirus iha área rehabilitasaun no elabora planu estratéjiku CNR periodu tinan 2019-2030.

Ministra hatutan liu tan, esforsu hotu Governu halo ona maibé esforsu hirak ne’e seidauk sufisiente, tanba ne’e mak polítika VIII governu konstitusionál sei garantia resposta ne’ebé adekuadu ba sidadaun hotu, liu-liu oinsá bele hadia kualidade moris ba ema ho defisiénsia atu hetan rehabilitasaun ne’ebé justu, espesializadu no integradu.

“hosi hau nia parte sei kolabora di’ak ho ADTL no organizasaun sira seluk ne’ebé hala’o nia kna’ar iha área defisiéntes no hau mós sei fó prioridade ba maluk defisiéntes sira liu hosi polítika orsamental MSSI tinan 2019 nian, nune’e bele iha kbi’it hodi fó tulun ba instituisaun solidariedade sosiál-ISS ne’ebé fó atendimentu ba maluk defisiéntes sira”, Katak Ministra.

Iha fatin hanesan, Presidente Konsellu Asosiasaun Defisiéntes Timor-Leste, Joaquim Freitas Soares hateten “ami iha rekomendasaun importante balun ne’ebé hato’o ona ba Ministra no ba Parlamentu Nasionál katak, ita tenke implementa ona ho di’ak polítika nasionál ba difisiénsia iha Timor-Leste ne’ebé aprovadu iha 2012, estadu Timor-Leste persiza ratifika ona konvensaun direitus ba ema ho defisiénsia nomós husu atu estabelese konsellu nasionál ba ema ho difisiénsia, orgaun ida ne’e importante tebes atu fasilita, kordena no halo peskiza ruma nomós loke debates públiku, tanba asuntus defisiénsia tenke tau ba prioridades iha prosesu dezenvolvimentu”.

Nune’e mós, Embaixadór Australia iha Timor-Leste, Peter Roberts hateten, Australia iha komitmentu atu kontinua suporta ema ho defisiénsia, liu hosi treinamentu ba asosiasaun sira ne’ebé hala’o servisu hodi atende ba maluk defisiéntes sira, hodi bele atinji ba tópiku ne’ebé ohin hateten katak la iha ema ida mak hela iha kotuk. Espera katak Timor-Leste bele ratifika konvensaun direitus ema ho defisiénsia iha futuru, esplika Peter.

This post is also available in: English