SEREMÓNIA DESPEDIDA MINISTRA NO SEAV

Ministra Solidariedade Sosiál, Dra. Florentina da Conceicão Pereira Martins Smith no Sekretáriu Estadu Asuntus Veteranus-SEAV, Sr. Andre da Costa Belo “L4” halo seremónia despedida ho funsionáriu Ministériu Solidariedade Sosiál-MSS, Instituisaun Solidariedade Sosiál-ISS no parseiru sira. Seremónia refere hala’o iha edifísiu sentrál MSS Kaikoli-Dili, loron Kinta-Feira, (14/06/2018).

Iha biban ne’e, Ministra MSS hateten, servisu iha liña kordenasaun kapas teb-tebes no asegura nafatin hodi nune’e bele hala’o servisu diak liu no durante fulan sia (9) iha MSS ami avalia funsionáriu barak mak gosta aprende no rona nomós ami apresia teb-tebes ba funsionáriu nia dedikasaun no hahalok servisu lahetan difikuldade wainhira hala’o ami nia knar iha Ministériu ida ne’e.

Ministra realsa liu tan, durante mandatu hala’o visita traballu kompleta Municipiu 11 ho RAEOA iha fatin hamutuk 13 no difikuldade barak mak sei resolve no husu ba funsionariu sira kontinua servisu ho profesionalismu hodi hadia povu nia moris.

Iha fatin hanesan, Sekretáriu Estadu Asuntus Veteranus-SEAV hato’o, agradesimentu ba funsionáriu sira no hala’o imi nia knar ho responsabilidade maske durante ami nia mandatu uja orsamentu duodesimu maibe servisu lao ho diak.

Ikus liu SEAV hateten, VII Governu Konstituisaun hala’o koperasaun servisu ho Diretor-Jeral, Diretores Nasionais, Diretores Municipios, Xefes Departamentu, Asesor Nasionál no Internasional to’o Funsionáriu servisu kapas no diak teb-tebes.

Iha seremónia ne’e direitamente Ministra MSS no SEAV simbolikamente entrega sertifikadu ba Gabinete Diretor-Jeral, Gabinete Inspektur Jeral, Diretores Nasionais, Diretores Municipios, Unidade UCSP, UTI, UAT, Intituisaun Solidariedade Sosiál-ISS no Parseiru sira.

Partisipa iha seremónia mak hanesan, Diretor-Jeral protesaun sosiál ba asuntus kombatentes libertasaun nasionál, Eugénio João Amado de Maria Soares, Diretores Nasionais, Diretores Municipios, Xefes Departamentu, Asesor Nasionál no Internasional, ISS, Funsionáriu MSS no Parseiru sira.