SERIMÓNIA INAUGURASAUN MONUMENTU SAUDOZO “SIA-LESU”

Ministra Solidariedade Sosiál no Inkluzaun-MSSI, Armanda Berta dos Santos hamutuk ho Sekretáriu Estadu ba Asuntus Kombatentes Libertasaun Nasionál-SEAKLN, Gil da Costa “Oan Soru”, Sekretáriu Estadu ba Protesaun Sivil-SEPS, Alexandrino Xavier Araújo no Membru Parlamentu Nasionál-PN, Antoninho Bianco hala’o Serimónia Inaugurasaun Monumentu Saudozo Mario da Silva “Sia-Lesu”, iha Suku Leo-Lima, Postu Administrativu Hato-Udo, Munisípiu Ainaro, Loron Tersa-Feira, (20/08/2019).

“Saudozo mate iha loron 8 fulan Fevereiru tinan 1984, oan hamutuk nain 10 no nain 7 husik hela mundu ho nain 3 mak sei moris kompostu mane 2 no feto 1”.

Iha biban ne’e, Ministra MSSI hateten, ohin loron importante ita halibur iha fatin ida ne’e hamutuk ho oan kiak no familia bo’ot saudozo Mario da Silva “Sia-Lesu” nia no momentu ida ohin importante tebes marka tan istoriku ida tanba ohin hamutuk iha ne’e selebra mós loron aniversariu FALINTIL ba dala 44.

Ministra MSSI hatutan, mesmu nune’e ita hamutuk iha fatin ida ne’e hodi halo’ot restu mortais no inaugurasaun ba monumentu saudozo Mario da Silva “Sia-Lesu” ho nia vida tomak ba libertasaun patria ida ne’e iha tempu okupasaun Indonesia nian no husik hela familia tomak hodi dedika nia a’an defende direitu determinasaun ita nia independensia.

“Hau hato’o sentidu profunda ba familia saudozo Mario da Silva “Sia-Lesu” mesmu nia la hamutuk ho ita maibe memoria saudozo nia hamutuk ho ita nafatin”, dehan Ministra MSSI.

Iha serimónia ne’e direitamente halo’ot restu mortais saudozo Mario da Silva “Sia-Lesu”, tesi fita husi Ministra MSSI, Armanda Berta dos Santos no asina plaka husi Sekretáriu Estadu ba Asuntus Kombatentes Libertasaun Nasionál-SEAKLN, Gil da Costa “Oan Soru” akompaña husi Sekretáriu Estadu ba Protesaun Sivil-SEPS, Alexandrino Xavier Araújo, Membru Parlamentu Nasionál-PN, Antoninho Bianco no Amo Párokia Hato-Udo mak fó bensaun ba monumentu Saudozo Mario da Silva “Sia-Lesu”.

Partisipa iha serimónia inaugurasaun mak hanesan, Adjunta Administrador Munisípiu Ainaro, Komandante PNTL Munisípiu Ainaro, Komandante F-FDTL Munisípiu Ainaro, Administrador Postu Administrativu Hato-Udo, Diretores Liñas Ministerial Munisípiu Ainaro, Xefes Sukus, Veteranus, Familia oan kiak, Komunidade no Estudante sira.