TALK SHOW ITA NIA GOVERNU

Ministra Solidariedade Sosiál, Isabel Amaral Guterres akompaña ho Presidente Komisaun (F) hosi Parlamentu Nasionál, Virgilio da Costa Hornai no Diretór Fongtil, Arsenio Pereira hala’o Talk Show iha programa ita nia Governu, ne’ebé kóalia kona-ba asuntus sosiais. Programa Talk Show refere organiza hosi Secretário Estado de Comunicacão Sosiál-SECOM no Radio Televisaun Timor-Leste-RTTL ep. ne’ebé hala’o iha Salaun Museu Resisténsia Timor-Leste, Loron Segunda-Feira, (09/05/2016).

Objetivu hosi programa ne’e mak, oinsa bele fó informasaun no hanoin ba malu entre servisu liñas ministeriais, Sosiedade Sivil no Parlamentu Nasionál núdar orgaun fiskalizador ba implementasaun programa Governu nian, liu-liu ba komunidade sira ne’ebé benefisia hosi programa Seguransa Sosiál, Idosos no Invalides, Bolsa da Mãe no Dezastres Naturais ne’ebé durante ne’e implementa hosi Ministériu Solidariedade Sosiál-MSS, nune’e bele hadia di’ak liu tan iha futuru no ikus mai bele fó satisfasaun ba ita nia komunidade sira.

Iha talk show refere, hosi parte Audensia haree katak durante implementasaun programa Ministériu Solidariedade Sosiál nian la’o di’ak tebes maibé nafatin iha preoukupasaun liu-liu kona-ba servisu liñas Ministeriais, programa Idosos no Invalides, Seguransa Sosiál, nst. atu Ministériu bele haree no hadia di’ak liu tan ba servisu hirak ne’e hodi labele implika servisu atendimentu komunidade sira iha baze.

Hatan ba preoukupasaun hirak ne’e, Ministra Solidariedade Sosiál, Isabel Amaral Guterres hateten, iha tinan 2012 estabelese ona politika nasionál kona-ba ema defisientes no kria ona Centru Reabilitasaun Nasionál-CRN hodi fasilita kadeira roda, ain falsu, liman falsu inklui halo atendimentu direta ba ema defisientes sira iha baze. Kona-ba ema moras mental Ministériu halo ona parseria ho Sentru São João de Deus-Laclubar atu bele haree no tau matan ba sira hodi bele rekopera fila fali sira nia saúde hanesan ema normal.

Ministra realsa liu tan, Atendimentu ba programa Idosos no Invalides iha tinan 2015 Ministériu aloka orsamentu mais ou menus 34 mill i tal ba benefisiarius 96 mill, tanba ne’e husu ba entidades hotu inklui Autoridade lokais sira atu bele servisu no kolabora hamutuk ho Ministériu Solidariedade Sosiál.

Atu fó atendimentu ba idosos no invalides sira ne’ebé karik labele to’o iha fatin pagamentu, Ministra husu ba familia ou Autoridades lokais sira atu fó informasaun ba iha Ministériu ou ofisial Banco Nasionál Comerciu Timor-Leste (BNCTL) hodi nune’e sira bele halo pagamentu direta iha sira nia fatin, esplika Ministra.

Programa ne’e hetan partisipa hosi Diretóra Nasionál Rejime Contributivu Seguransa Sosiál, Aida Soares Mota, Diretór Nasionál Asisténsia Sosiál, Mateus da Silva, Xefe Unidade Komunikasaun Sosiál no Protokolu-MSS, Jaime A. Hanjam, Estudante hosi Universidade Nasionál Timor-Lorosa’e-UNTL no Universidade Oriental-UNITAL inklui mós Sosiedade Sivil.

This post is also available in: Tetum