TIMOR-LESTE SELEBRA LORON MUNDIÁL BA LABARIK

Loron 1 fulan juñu, ne’e loron direitu ba labarik iha mundu, Timor-Leste selebra loron ida ne’e hodi haree ba pasadu ne’ebé akontesementu barak iha Timor-Leste, vítima barak liu mak labarik ne’ebé hetan tortura, mate, violensia oi-oin, lakon inan aman, trafiku umanu no servisu forsadu. Tamba ne’e liu hosi selebrasaun ida ne’e hodi fó hanoin ba komunidade internasionál inklui Timor-Leste kona-ba importánsia labarik sira nia dezenvolvimentu. Selebrasaun ne’e hala’o iha Sentru Konvensaun Munisípiu Baucau, iha loron Kinta-Feira to’o Sábadu, (06-08/06/2019).

Iha selebrasaun ne’e, Vise-Ministra MSSI, Signi Verdial hato’o, sei halo esforsu tomak hodi proteje ita nia alin sira hosi risku sosiál oi-oin ne’ebé akontese iha ita nia nasaun, ho nune’e iha selebrasaun loron mundiál ba labarik sira ne’e, atu fó hanoin ba ita hotu, atu hapara esplorasaun físiku no mental ba labarik sira iha família, iha eskola nomós iha ita nia komunidade nia le’et, dehan Vise-Ministra.

Iha biban ne’e, Vise-Ministra apela ba komunidade tomak katak, labarik hotu tenke moris livre, hosi aktu bandalismu, brutalismu, krime juvenil, nomós livre hosi alvu droga no fuma.

Vise-Ministra informa liutan katak, problema ne’ebé labarik sira hasoru sei tau iha planu asaun nasionál ba kriansas, ita halo ona maibé ita nia esforsu seidauk másimu, ita sei kontinua halo tuir kbi’it governu nian nafatin atu tau atensaun ba situasaun sira ne’e.

Programa prioridade MSSI nian hanesan ba inan ho labarik sira mak liu hosi programa bolsa da mãe, ita tenta nafatin atu hadia, liu hosi oinsá halo monitorizasaun no avaliasaun ida diak hodi nune’e, inan ho labarik sira ne’ebé benefisiu hosi programa bolsa da mãe fó duni ba ema ne’ebé merese atu hetan hodi sira bele asesu ba edukasaun, saúde nomós hetan nutrisaun ne’ebé diak, dehan Signi.

Ikus liu, Vise-Ministra fó parabéns ba labarik timor oan tomak ne’ebé selebra ona loron mundiál iha Timor-Leste.

Iha fatin hanesan, Presidente Autoridade Munisípiu Baucau, Antonio Guterres hato’o orgullu tamba loron ida ne’e bele selebra iha Munisípiu Baucau, tamba ne’e, husu ba inan aman sira katak, investe labarik hahu hosi uma laran, dehan Antonio.

Representa labarik iha Timor-Leste hato’o sira nia perkupasaun hanesan asesu ba Edukasaun, Saúde, Ekonómia no Justisa atu nune’e hodi moris ho saúdavel.

Selebrasaun ne’e hala’o hosi Komisaun Nasionál Direitu ba Labarik-KNDL iha Timor-Leste no Partisipa iha selebrasaun ne’e mak hanesan, Vise-Presidente Parlamentu Nasionál, Luis Roberto da Silva, Ministru Reforma Legislativa no Asuntus Parlamentares, Fidelis Manuel Leite Magalhães, Vise-Minista Saúde, Élia Antonia de Araújo dos Reis Amaral, Diretór Geral Ministériu Edukasaun no Justisa, Representante Unicef iha Timor-Leste, Professores, Estudantes no Autoridade Lokais.