MSS ASINA MOU HO INSTITUISAUN SOLIDARIEDADE SOSIÁL

Ministériu Solidariedade Sosiál (MSS) liu hosi Diresaun Nasionál Dezenvolvimentu Sosiál (DNDS) kontinua apoiu no servisu hamutuk ho Instituisaun Solidariedade Sosiál (ISS) ne’ebé prense ona kriteria hodi hetan fundus hosi MSS ba implementa programa iha area protesaun no asistensia sosiál, vitima violensia bazeia ba jeneru, labarik iha risku no vitima, ema ho defisiensia no familia vulneravel sira. Asina Memorandum of Understanding (MoU) refere hosi Vise-Ministru Solidariedade Sosiál, Eng. Miguel Marques Gonçalves “Manetelu” ho Instituisaun Solidariedade Sosiál iha Salaun Edifísiu Sentrál MSS Kaikoli-Dili, Loron Kinta-Feira, (21/04/2016).

Instituisaun solidariedade sosiál hamutuk 35 mak konsege avalia no ikus mai 30 instituisaun mak hetan aprovasaun hodi asina MoU maibe iha instituisaun 2 mak seidauk asina MoU iha loron refere.

Iha asina MoU ne’e, Vise-Ministru MSS hateten, hahu hosi 1o Governu to’o iha VIo Governu konstitusional, MSS servisu hamutuk ho instituisaun solidariedade sosiál, sosiedade sivil no NGO sira ne’ebé tau matan ba direitus labarik, ema ne’ebé iha violensia domestika no ba defisiente sira. Asina kontratu servisu hamutuk ho sira no instituisaun seluk hanesan mós PDHJ hodi fo orientasaun no esplikasaun ba koperasaun ne’e rasik nomós iha prosesu ezekusaun to’o ba iha relatoriu.

Vise-Ministru hatutan, husu para iha koperasaun ne’e tenki asegura katak implementasaun no ezekusaun ne’e bazeia ba planu no objetivu ne’ebé sira tau ona iha sira nia proposta tanba identifika iha tinan 2015 katak ISS balun hatama planu ohin seluk iha ezekusaun halo buat seluk tanba ne’e mak prosesu atu aprova proposta tinan ida ne’e nian halo ohin seluk no bolu ISS sira mai hodi husu perguntas ba ezekusaun 2015 nian lao nusa no planu ba 2016 ne’e lao nusa, depois komisaun avaliasaun justifikadu ho informasaun ne’ebé sira fo aprova kedas proposta.

”Kuaze orsamentu ne’ebé sira propoin barak mak hatun tanba haree ba sira nia planu atividade ka planu asaun ne’ebé atu ezekuta iha 2016”, Dehan Vise.

Iha fatin hanesan, Provedor Direitus Humanus no Justisa (PDHJ), Silverio Pinto Baptista hato’o, sira ne’ebé maka simu osan Governu liu hosi MSS sira mós tenki halo ezekusaun orsamentu ne’ebé maka transparante no akontabilidade maibe sira mak halo mal administrasaun ruma iha ne’eba kuandu mosu korupsaun parte PDHJ no Komisaun Anti Korupsaun (KAK) bele loke prosesu hasoru ba parseirus sira.

Provedor informa liutan, Governu labele tau deit osan entrega deit ba sira maibe Governu mós tenki ajuda parseiru sira ne’e para atu halo jestaun ne’ebé maka diak para minimiza no redus risku ne’ebé maka ohin temi no labele hamosu mal administrasaun to’o ba iha korupsaun.

Ikus liu Provedor hateten, prontu atu ajuda MSS ho parseirus sira hodi haree implementasaun orsamentu ne’ebé ohin asina akordu ida ne’e.

Partisipa iha asina MoU ne’e mak, Diretor-Jeral Protesaun Sosiál Asuntu Kombatentes Libertasaun Nasionál, Eugénio João Amado de Maria Soares, Diretor-Jeral Servisus Korporativus, Rui Manuel Gago Exposto, Komisaria Direitu ba Labarik, Diretores Nasionais, Diretores Sentru Solidariedade Sosiál, Xefes Departamentus, Asesor Nasionál no Internasional, Parseirus no Funsionáriu sira.

Comments Closed

Comments are closed. You will not be able to post a comment in this post.