MSS REALIZA PRA-DIALOGU IHA MUNISIPIU LIQUIÇA

Ministériu Solidariedade Sosiál-MSS, liu hosi Diresaun Nasionál Dezenvolvimentu Sosiál, Departamentu Hari’i Paz no Koezaun Sosiál hamutuk ho Diretór Sentru Solidariedade Sosiál Munisipiu Liquiça, ONG Belun, Lider komunitarius no parte seguransa-PNTL Munisipiu Liquiça, fasilita pra-dialogu ho komunidade sira, atividade ne’e hanesan prosesu ida hodi hetan informasaun no konsensus atu kontinua ba nahe biti boot, nune’e bele fó solusaun ba problema ne’ebé akontese iha dia 13 Fevereiru 2016 iha Munisipiu Liquiça entre Suku Lisadila, Vatubou no Leotela, aktus konflitu ne’e halo hosi joven sira ne’ebé rezulta ema nain ida mate no ema nain rua kanek, pra-dialogu refere hala’o iha Suku Leotela-Lefa, loron Kinta-Feira, (14/04/2016).

Haree ba konflitu ida ne’e, kria situasaun instabilidade, tamba komunidade sira tauk no trauma ba aktus konflitu ne’ebé akontese, ho nune’e iha pra-dialogu refere komunidade husi Suku hirak ne’e deklara katak hakarak duni atu kontinua ba nahe biti boot hodi nune’e sira bele iha relasaun di’ak ba malu, moris iha paz no dame nia laran atu nune’e bele hala’o sira nia moris ou atividade ho livre. Objetivu Pra diálogu ida ne’e halo la’os atu julga suspeitu sira maibé atu fó solusaun ba problema ne’ebé mak akontese ona, liu-liu oinsá bele kria fali paz iha komunidade sira nia le’et, maibé mós la taka dalan ba prosesu justisa nian.

Iha oportunidade ne’e, Xefe Departamentu Hari’i Paz no Koezaun Sosiál, Miguel Soares Trindade hateten, pra-diálogu ne’e realiza tamba iha inísiu proposta ida haruka husi Diretór Sentru Solidariedade Sosiál no Komandante Polisia Munisipiu Liquiça hamutuk ho Autoridades ou lider komunitarius sira ne’ebé haruka ba Ministra Solidariedade Sosiál no despaxu ba Diresaun Nasionál Dezenvolvimentu Sosiál-DNDS, liu-liu Departamentu Hari’i Paz no Koezaun Sosiál hodi tau iha planu asaun atu halo kordenasaun ho Diretór Sentru Solidariedade Sosiál hamutuk ho Autoridade lokais sira hodi fasilita prosesu refere.

Xefe Departamentu ne’e realsa liu tan, prosesu ne’e ita hahu ho aprosimasaun ba parte hotu-hotu, liu-liu Suku Lisadila, Fatubou no Leotela, ne’ebé ikus mai sira hotu hanoin katak hakarak atu tu’ur hamutuk iha pra-dialogu ida ne’e atu oinsá bele koalia no hadia relasaun ba malu, tamba haree ba nia impaktu husi problema ne’e mak komunidade sira la hakmatek, tauk no trauma i la iha estabilidade, tamba ne’e mak, Departamentu hari’i Paz no Koezaun Sosiál hamutuk ho Lider Komunitariu no Komunidade sira tu’ur hamutuk atu oinsá bele uza meus diálogu no nahe biti boot hodi nune’e bele hakotu problema ida ne’e ho meus kulturais nune’e konflitu ne’ebé mak iha labele akontese fali iha futuru.

Husi parte Suku Lisadila, Fatubou no Leotela sei asina mós akta deklarasaun simu malu ninian no sei disidi loron ba seremónia nahe biti boot ne’ebé iha tempu badak nia laran sei realiza, dehan Trindade.

Entertantu, Xefe Suku Leotela, Antonio dos Santos hateten, Husi pra-diálogu ida ne’e, ami hakarak kontinua ba prosesu nahe biti boot atu halo juramentu ba parte hotu-hotu, liu-liu komunidade no juventude sira husi Suku Lisadila, Fatubou no Leotela hodi labele kria tan konflitus iha futuru, i prosesu nahe biti boot ida ne’e ami persiza hala’o lalais tamba to’o agora komunidade sira tauk ba malu no trauma hodi la’o ba mai no tauk hala’o nia atividade hanesan agrikultura. Tamba ne’e hau husu ba komunidade hosi suku tolu ne’ebé halo konflitus atu kria rekonsiliasaun, hodi bele iha unidade, paz no dame iha ami nia moris lor-loron.

Nune’e mós hosi parte vítima (aman matebian)-Suku Lisadila, Agusto Xavier hateten, ba problema ne’e, nia rasik ho nia oan la hatene, tamba durante ne’e husi nia fámilia la iha problema ho ema seluk, maibé hau nia oan mate ona entaun prosesu ne’e tomak hau entrega ba orgaun kompetente ou parte Justisa atu nune’e bele prosesa suspeitu sira tuir lei ne’ebé vigora iha ita nia nasaun Timor-Leste.

“Kona-ba prosesu nahe biti boot, husi parte ami vítima nafatin iha vontade di’ak atu simu malu hodi bele moris hakmatek fali hanesan uluk no bele hala’o ami nia atividade lor-loron nian,” Dehan Xavier.

Partisipa iha pra-dialogu ne’e mak hanesan, Administrador Postu Maubara no Liquiça, Komandante Polisia Munisipiu Liquiça, Representante ONG Belun, inklui autoridades lokais no Komunidade husi Suku Lisadila, Watubou no Suku Leotela.

Comments Closed

Comments are closed. You will not be able to post a comment in this post.