FUNSAUN PÚBLIKA SEI HALA’O DIAGNÓSTIKA FORSA

Prezidente Funsaun Públika, Dr. Faustino Cardoso hamutuk ho Ministru Administrasaun Estatal, Dr. Dionisio Babo no Ministra MSS, Sra. Isabel Amaral Guterres inklui mós Diretóres Jerais, Diretóres Nasionais no Xefes Departamentus Rekursus Humanus hosi Ministériu hotu-hotu, ofisialmente lansa ona Diagnóstika Forsa Traballu ne’ebé iha tempu badak hosi Parte Funsaun Públika sei hala’o diagnóstika ba Ministériu sira hotu. Ministériu Solidariedade Sosiál-MSS mak sai hanesan pilotu ba programa refere. Seremónia lansamentu ne’e hala’o iha Salaun Edifísiu Sentrál MSS Kaikoli-Dili, Loron Sesta-Feira, (08/04/2016).

Diagnóstika ne’e hala’o atu haree Rekursus Humanus ba servisu Ministériu nian, relasiona ho efisiénsia no efikasia, atu nune’e bele hadi’a forsa traballu funsaun públika ba instituisaun Governu nian, hodi bele atinji metas sira ne’ebé eziste ona iha planu estratéjiku Ministériu ida-idak iha futuru.

Hafoin lansamentu, Ministra Solidariedade Sosiál, Sra. Isabel Amaral Guterres hateten, hosi parte Funsaun Públika dezenvolve ona métodu ida atu hala’o diagnóstika ba instituisaun Governu hotu, no sira eskolla MSS hanesan Ministériu pilotu, no perguntas ne’ebé hosi parte Funsaun Públika prepara mak hamutuk 400 resin, ho nia tópiku hamutuk 11, no maneira atu priénse ne’e mak Sim ou Não. Haree mós ba ema na’in hira mak servisu iha MSS, kompostu feto hira no mane hira.

“Diagnóstika ida ne’e la’ós haree ba funsionáriu públiku deit, maibé mós ba Asesores sira, tantu Nasionais no Internasionais, inklui mós funsionárius kontratadu no kazuais sira hotu, atu nune’e ita bele determina no hatene katak atu hala’o servisu ou funsaun iha área ida-idak persiza ema na’in hira,” dehan Ministra.

Ministra MSS salienta mós katak, programa ida ne’e sei hala’o iha nasionál nomós iha munisípiu sira hotu, no ba Ministériu Solidariedade Sosiál rasik sei hahú iha loron 11-29 Abríl 2016.

Hosi parte ministériu, dehan Ministra, prontu atu koko no kolabora ho Funsaun Públika, tanba ne’e tenke fó liman ba malu atu dezenvolve rai ida ne’e, no importante tebes diagnóstika ne’e atu bele ajuda kona-ba ema hira mak persiza iha Ministériu ida, no oinsá ho nia kapasidade rekursu humanu ne’ebé iha atu bele servisu iha Ministériu ida nia laran.

Comments Closed

Comments are closed. You will not be able to post a comment in this post.