SERIMÓNIA PRIMEIRA PEDRA BA MONUMENTU

Vise Ministru Solidariedade Sosiál, Eng. Miguel Marques Gonçalves “ Manetelu” hamutuk ho reprezentante hosi partidu Frente Revolusionáriu Timor-Leste Independente (Fretilin), União Democrática Timorense (UDT), Associação Popular Democrática Timorense (Apodeti), Klibur Oan Timor As’wain (KOTA) no partidu Trabalista hala’o primeira pedra ba monumentu rekonsiliasaun iha Aifu, Suku Petete, Postu Administrativu Ermera, iha loron Kinta-Feira, (07/04/2016).

Monumentu ida ne’e halo, tanba iha tinan 1974 no 1975 kuadrus, delegadus no militantes hosi partidu lima ne’ebé mensiona iha leten halo asaun hodi ataka malu no ikus mai maluk barak mak mate iha fatin refere. Antes hala’o seremónia premeira pedra, hanesan baibain, dahuluk halo serimónia tradisionál hodi oho animál balun atu tau nia ran iha fatin refere no haree mós animál nia bulan hodi nune’e labele akontese problema ruma ba prosesu konstrusaun refere iha kontekstu natureza.

Iha biban ne’e, Vise Ministru MSS, Eng. Miguel Marques Gonçalves “ Manetelu” hateten, atu harii monumentu ida ne’e inisiativa mai hosi komunidade rasik, hanesan reprezentante Governu, liu-liu Ministériu Solidariedade Sosiál ne’ebé dadaun ne’e tutela hela asuntu veteranus nian ho ninia prezénsa iha ne’e atu fó i’is liu tan ba ita boot sira nia inisiativa, maske iha orsamentu jerál tinan 2016 la kontempla orsamentu balun ba monumentu ne’e, maibé espera katak Governu sei la taka matan i Governu sei la husik ita boot sira la’o mesak.

Dehan Manetelu, kuandu hahú ona tenke finaliza, se la’e sira balun ne’ebé rekolha ona nia ruin no barak liu seidauk rekolla, sira hateke hela ita, tanba ne’e hamutuk lia fuan ida no espera, iha prosesu konstrusaun hahú to’o remata Ermera oan sira tenke hamutuk nafatin no ikus mai ita bele halo inaugurasaun ba monumentu ida ne’e rasik.

Entertantu, Prezidente Komisaun Organizadora ba monumentu Aifu, Ernestu Fernandes “Dudo” hateten, inisiativa atu harii monumentu ida ne’e, tanba uluk ema ne’ebé iha partidu laran oho malu, agora funu hotu ona mós ita sei oho malu, ho ida ne’e mak ami iha inisiativa ida atu halibur partidu lima no komunidade sira hotu iha Suku 12, atu so’e kro’at no ódiu vigansa ba malu, tanba iha ukun-an ida ne’e la iha ona tempu atu ita oho malu ou vinga malu.

Kona-ba masakre Aifu, veteranus ne’e esplika, iha tinan 1975, loron 11 kalan no dia 12 dadersan partidu polítiku sira halo golpe ataka malu iha Aifu no Ermera tomak afetadu hosi masakre ne’e rasik i ema to’o atus mak mate iha fatin ida ne’e.

Nune’e mós Prezidente hosi partidu UDT, Gill Tilman hateten, ohin iha disponibilidade no boavontade atu hari’i monumentu ida reprezenta ema hotu-hotu ne’ebé sai vítima iha funu naruk ida ne’e.

“Tanba ne’e dame tenke hahú hosi ita, hahú husi ema ne’ebé iha vontade harii dame iha ita nia rain, labele dehan halo dame maibé ema seluk sei afetadu no diskriminadu hela,” esplika Prezidente Partidu UDT ne’e

Partisipa iha seremónia refere mak reprezentante hosi Parlamentu Nasionál, Autoridades lokais, lia na’in no komunidade iha área refere.

Comments Closed

Comments are closed. You will not be able to post a comment in this post.