VMSSI HALA’O ENKONTRU HO KNKSTL

Vise-Ministra Solidariedade Sosiál no Inklusaun-VMSSI, Signi Chandrawati Verdial, Diretór-Jerál Servisus Korporativus, Rui Manuel Gago Exposto hamutuk ho Sekretáriu Ezekutivu Komisaun Nasionál Kombate HIV/SIDA Timor-Leste (KNKSTL), Daniel Marçal hala’o enkontru kona-ba liña koordenasaun servisu entre KNKSTL no MSSI. Enkontru refere hala’o iha Salaun MSSI Kaikoli-Dili, Loron Kuarta-Feira, (18/07/2018).

Iha biban ne’e VMSSI hateten, komisáriu KNKSTL iha Ministériu Solidariedade Sosiál no Inklusaun-MSSI hodi halo liña koordenasaun servisu atu nune’e instituisaun rua ne’e béle servisu hamutuk hodi habelar informasaun kona-ba moras HIV/SIDA ba komunidade sira.

Iha fatin hanesan, Sekretáriu Ezekutivu Komisaun Nasionál Kombate HIV/SIDA Timor-Leste (KNKSTL), Daniel Marçal hato’o, ohin hasoru malu ho VMSSI hodi halo koordenasaun servisu entre instituisaun rua no planu prioridade fulan 6 nian ami iha ona konkordansia hamutuk ho MSSI.

Sekretáriu realsa liu tan, KNKSTL kontinua nafatin planu interior nian tanba planu ka informasaun ne’e fokus oinsa ema ida-idak nia konsiensia no muda hahalok ne’ebé tama ba risku.

“Ema balun senti buat foun tanba komisaun HIV/SIDA mai fali iha MSSI maibe problema ne’e laos problema kona-ba saude deit maibe problema ka morál ida ne’e hanesan atitude sosiál”, dehan Sekretáriu.

Ikus liu Sekretáriu hateten, problema ne’ebé importante mak problema sosiál balun ne’ebé ita persija hadi’a hamutuk hanesan droga ne’e agora nakonu iha ita nia rai laran no ransu livre ne’e sai hanesan problema sosiál tanba ne’e persijamente ita hotu nia atensaun.

Partisipa iha enkontru mak hanesan, Xefe Gabinete Ministra no Vise-Ministra MSSI, Asesór Nasionál no Internasional sira.

Comments Closed

Comments are closed. You will not be able to post a comment in this post.