ENKONTRU OFISIÁL ENTRE MINISTRA & VISE-MINISTRA

Ministra Solidariedade Sosiál no Inklusaun, Armanda Berta dos Santos hamutuk ho Vise-Ministra, Signi Candrawati Verdial hala’o enkontru ho Embaxadór Japaun. Objetivu enkontru ne’e atu fahe informasaun ba malu nune’e bele hametin di’ak liu tan servisu hamutuk ne’ebé durante ne’e la’o ona no kontinua identifika difikuldades ne’ebé mak ministériu enfrenta hodi nune’e governu japaun nafatin fó apoiu iha futuru, liu-liu iha relasaun ho programa ministériu nian, espesialmente iha área Seguransa Sosiál inklui rehabilitasaun ba ema ho defisiensia. Enkontru refere hala’o iha edifísiu sentral MSSI-Kaikoli-Dili, Loron Terça-Feira, (03/07/2018).

Hafoin enkontru, Ministra-MSSI, Armanda Berta dos Santos hateten, entre nasaun Timor-Leste ho Japaun hala’o ona servisu hamutuk iha área sosiál, buat barak ne’ebé mak hosi embaxada Japaun suporta ona liu hosi Ministériu. Objetivu enkontru ohin mak oinsá nasaun Japaun bele fó apoiu ba Timor-Leste, liu-liu iha área seguransa sosiál, defisientes, espesialmente ba rehabilitasaun defisientes sira.

Entertantu, Vise Ministra MSSI, Signi Candrawati Verdial hateten, ohin ita nia enbaixadór Japaun mai halo vizita iha Ministériu, simplesmente atu fó parabens ba ministra nomós vise-ministra. Iha vizita ne’e mós atu explora posibilidade ida, ne’ebe ba oin ita bele halo parseiru, tanba Japaun mós prontu ajuda ita iha área sosiál hanesan saude, edukasaun. Ita iha programa prioridade ba VIII Governu, ezemplu haree ba programa siguransa sosiál, karik iha posibilidade ruma ita bele hetan ajuda husi Governu Japaun, dehan Vise Ministra.

Comments Closed

Comments are closed. You will not be able to post a comment in this post.