Vice Ministra MSSI hala’o Lansamentu programa Naroman ba Suku

Programa Naroman ba Suku hanesan programa ida hosi SECOMS ne’ebé  ho objetivu mak oinsá bele promove suku rurál sira no hakbiit komunidade nia kapasidade hodi asesu ba informasaun, informa ba komunidade kona-ba programa VIII Governu Konstitusionál no rona komunidade sira nia preokupasaun kona-ba dezenvolvimentu nomós transmite ba Ministériu sira ne’ebé mak relevante, hasa’e komunidade sira nia koñesimentu kona-ba dalan no prosesu halo planu dezenvolvimentu nomós prosesu implementasaun, hasa’e no haluan povu nia partisipasaun ativu iha dezenvolvimentu nia prosesu tomak no goza di’ak dezenvolvimentu nia benefisiu sira.

Iha atividade lansamentu ba programa naroman ba suku ida ne’e, hala’o mós diálogo ho komunidade Suku Quirlelo hodi bele hatene komunidade sira nia preokupasoens nune’e iha VIII Governu Konstitusionál bele fó resposta ba preokupasaun ne’ebé komunidade sira hasoru.

Iha diálogu, Vise-Ministra Solidariedade Sosiál no Inkluzaun, Signi Verdial, hodi hatan ba preokupasaun komunidade Suku Quirlelo ne’ebé liga ho servisu Ministériu Solidariedade Sosiál no Inkluzaun-MSSI, liu-liu ba subsidiu ferik katuas sira nian, dehan Vise- Ministra, tinan tinan ita nia kustu ba vida sa’e maka’as no ita hatene katak osan (red-subsidiu) ne’e persiza iha duni mudansa, maibé antes atu halo mudansa ita persiza halo uluk peskiza ida mak foin ita bele halo desizaun hodi muda pólitika ne’ebé mak iha.

Kona-ba benefisiáriu ne’ebé mak mate ita persiza sertifikadu herdeiru, ita nia dekreitu ida uluk la kondis ho ita nia kondisaun real ne’ebé mak ita hasoru, maibé MSSI halo esforsu hodi simplifika nune’e familia benefisiáriu sira ne’ebé mak mate bele halo deit karta hosi Xefe Suku no hetan rekoñesimentu hosi Administradór  i bele ona lori ba banku atu hetan ita boot sira nia direitu, esplika Vise-Ministra.

Iha oportunidade hanesan, Sekretáriu Estadu Komunikasaun Sosiál, Merício Juvinal dos Reis “Akara” hateten, Liu hosi programa ida ne’e bele fasilita komunidade sira atu bele hato’o sira nia preokupasaun ba Governu no Parlamentu hodi nune’e bele fó resposta ba preokupasaun liu-liu liga ba komunidade sira nia nesesidade.

Atividade importante balun ne’ebé mak ita sei halo mak, kontinua dezenvolve sentru informasaun ida iha nivél suku atu komunidade bele akompaña informasaun sira ne’ebé mak la’o iha nível nasionál nomós iha teritóriu timor laran tomak, sei dezenvolve mós biblioteka komunitáriu ida hodi fó asesu ba livro no dukumentus ne’ebé mak importante ba ita nia komunidade sira, sei hala’o mós atividade loke filmajem kona-ba dezenvolvimentu iha ita nia rain atu nune’e komunidade sira bele akompaña no bele halo diskusaun no bele sai hanesan ispirasaun ida hodi hamosu planu ruma no bele dezenvolve ninia suku ho di’ak liu tan.

Objetivu prinsipal ida mak hakarak lori governasaun ba iha áreas rurais ne’ebé mak ladun asesu ba informasaun no ladun iha interasaun direta ba ita nia membru governu sira atu nune’e komunidade iha áreas rurais mós bele transmite sira nia hanoin no sira nia preokupasaun nomós sira bele hato’o sira nia potensia positivu ne’ebé mak Suku iha, hanesan potensia turistiku, atividade kultural, nst.

Antes ne’e programa ida ne’e hala’o ona iha Suku Rotutu, Munisípiu Manufahi no Programa refere hanesan projeitu pilotu ida ne’ebé mak sei hala’o iha Suku 8 iha tinan 2019, maibé sei kontinua la’o iha Suku hotu-hotu, dehan Akara.

Partisipa iha lansamentu programa Naroman ba Suku ida ne’e mak, Sekretáriu Estadu Koperativas, Arsénio Pereira da Silva, Membrus Parlamentu, Administradór Munisípiu Aileu, Representante hosi liñas Ministeriais, PNTL no F-FDTL, Média, Autoridade Komunitária inklui Komunidade iha Suku refere.

This post is also available in: English