VISE-MINISTRA MSSI HALA’O VIZITA BA MUNISÍPIU …

Vise-Ministra Solidariedade Sosiál no Inkluzaun, Signi Verdial hala’o vizita ba Munisípiu Maliana ho objetivu hodi observa no rona rasik problemas sosiais ne’ebé mak enfrenta hosi komunidade refere. Vizita ida ne’e Vise-Ministra ho ninia komitiva hala’o enkontru ho Presidente Autoridades Munisípiu, Administradores Postus inklui Xefes Sukus ne’ebé hala’o iha Sala Enkontru Administrasaun Munisípiu Maliana, Loron Kinta-Feira, (23/05/2019).

Iha okaziaun ne’e, Vise-Ministra Solidariedade Sosiál no Inkluzaun, Signi Verdial hateten, objetivu vizita ida ne’e atu halo avaliasaun ba servisu MSSI ne’ebé liga ho munisípiu, hanesan pagamentu Idosos no Invalides, Bolsa da Mãe, kareta mate no kaisaun, ema moris ho vulneravél nomós asuntu dezastres atu nune’e planu ba futuru nian bele enkaixa difikuldades ne’ebé mak sira enfrenta hodi bele prevé mós orsamentu ida ne’ebé mak sufisiente atu ajuda servisu sira nian iha base.

Hatan ba preokupasoens, liu-liu Kona ba apoiu ba vítima dezastre ne’ebé mak sempre tarde, dehan Vise-Ministra, ba oin ministériu sei buka hela dalan atu hadia nune’e vítima sira bele hetan sira nia direitu ho lalais. Kona-ba asuntus defisientes agora dadaun ministériu buka atu halo dekretu lei foun ne’ebé tau atensaun ba maluk defisientes sira hodi revé fila fali dekreitu lei ne’ebé mak iha atu nune’e bele halo tratamentu ida ne’ebé mak di’ak ba maluk defisiente sira katak ema ne’ebé mak ho defisiensia maibe nia la 17 anos mós ita persiza halo tratamentu ida ne’ebé justu ba sira.

Politika rekoperasaun vítima dezastre nian sei entrega tomak ba munisípiu mak fornese, signifika sasan rekoperasaun ba ema sira ne’ebé vítima hosi dezastres naturais la persiza fornese hosi Díli mak mai ne’ebé lori tempu barak no kustus ne’ebé mak boot, tamba ne’e tenderizasaun hirak ne’e ita halo deit iha nível munisípiu ho loja sira ne’ebé prense kriteriu atu nune’e bele atende komunidade sira ho lalais, dehan Vise-Ministra.

Nune’e mós, Presidente Munisípiu Maliana, Zeferino dos Santos Soares hateten, difikuldade ne’ebé mak munisípiu hasoru mak problema apoiu material konstrusaun ba vítima dezatre ne’ebé mak sempre tarde, maibe tamba prosesu ne’e to’o iha nasionál no to’o tinan 1 ou 2 mak foin vítima sira bele hetan, tamba ne’e ami husu atu asuntu sosiais ne’ebé munisípiu bele resolve di’ak liu aloka nia orsamentu ne’e mai iha munisípiu mak jere, atu nune’e atendimentu bele lalais liu no bele hakbesik ona servisu ba povu.

Hafoin enkontru ho Autoridade Munisípiu, Vise-Ministra ho ninia komitiva kontinua hala’o vizita mós ba grupus negosiu iha Suku Saburai ne’ebé mak hetan apoiu fundus hosi MSSI rasik no visita ba Orfonatu Halecou, Dormitóriu Lolotoe no Uma Mahon Maria Tapo ho objetivu atu haree direta situasaun no kondisaun sira nian. Ikus liu, Vise-Ministra ho ninia komitiva hala’o enkontru ho Diretór no Funsionárius Sentru Solidariedade Sosiál Munisípiu Maliana.