VISE-MINISTRA MSSI HALA’O VIZITA TRABALLU IHA …

Vise-Ministra Solidariedade Sosiál no Inkluzaun, Signi Verdial, hala’o vizita traballu iha Munisípiu Lautem no vizita ida ne’e Vise-Ministra ho ninia komitiva halo diálogo ho Administradór Munisípiu, Administradores Postus inklui Xefes Sukus ho objetivu atu observa no rona informasoens iha área servisu sosiál nian ne’ebé mak durante ne’e komunidade sira enfrenta. Diálogo ne’e hala’o iha Salaun Enkontru Administrasaun Munisípiu Lautem, Loron Kinta-Feira, (11/07/2019).

Vizita traballu ida ne’e, Vise-Ministra MSSI ho ninia komitiva, hala’o primeiru vizita ba Monumentu Masakre Tchaivatxa, vizita Colégio Comunidade Cannosiana no orfonato São João Bosco Lospalos.

Iha biban ne’e, Vise-Ministra MSSI hateten, diálogo ida ne’e atu hasoru direta no rona prekupasoens no difikuldades ne’ebé maka komunidade sira enfrenta no ba oin Ministériu Solidariedade Sosiál no Inkluzaun-MSSI sei buka hela dalan atu hadia mak hanesan pagamentu idosos no invalides, bolsa da mãe, desastre naturais, defisientes, kareta mate no kaisaun.

Vise-Ministra hatutan, vizita mai iha ne’e hanesan haree fila fali halo reflesaun no avaliasaun ba programa ne’ebé maka MSSI implementa durante ne’e kona-ba saida mak diak no saida mak ladiak persija hadia para iha orsamentu tinan 2020 ne’e bele responde ba problema sira ne’ebé maka komunidade sira enfrenta liu-liu ba asuntus sosiál nian mak ohin diskute iha diálogo ida ne’e.

Iha fatin hanesan, Administradór Munisípiu Lautem, Zeferino dos Santos Sequeira hato’o, Agradesimentu no Bem-Vinda ba Vise-Ministra MSSI bele mai vizita iha Administrasaun Munisípiu Lautem halo diálogo ho Autoridade Lokal hodi rona direta prekupasoens no difikuldades ne’ebé maka durante ne’e komunidade sira enfrenta ba iha asuntus sosiais.

Administradór realsa liu tan, durante iha Munisípiu Lautem desde uluk to’o agora liña koordenasaun entre CSSM Lautem ho Administrasaun Munisípiu buat hotu-hotu lao diak no servisu saida deit mak hala’o iha munisípiu sempre liu hosi orientasaun administrasaun munisípiu tanba iha administrasaun munisípiu maka hatene nesesidade besik liu no administrasaun munisípiu liu hosi nia estrutura hahu hosi munisípiu, postu administrativu to’o iha suku.

Hafoin diálogo ho Autoridades Munisípiu, Postu no Autoridades Komunitarias Munisípiu Lautem, Vise-Ministra ho ninia komitiva hala’o enkontru ho Diretór Centru Solidariedade Sosiál Munisípiu Lautem ho ninia Funsionárius tomak hodi bele hatene sira nia prekupasoens no difikuldade ne’ebé mak durante ne’e sira enfrenta ba iha atendimentu komunidade sira no remata enkontru kontinua ba Vizita Madre ADM (Amal kasih Darah Mulia) no vizita Uma Mahon Lospalos.