VISE-MINISTRA MSSI INAUGURA PONTE IHA AILEU NO …
Hafoin Ministra entrega Projetu beé mo’os, estrada no baleta, eskola, nsst. iha Munisípiu Manufahi no Ainaro, Vise-Ministra Solidariedade Sosiál no Inkluzaun, Signi Verdial, kontinua entrega projetu estrada no ponte ba komunidade sira iha Munisípius Aileu no Ermera, projetu hirak ne’e iha ligasaun ho Projetu Hari’i Rezilénsia iha Komunidade sira tuir Estrada Korredór Díli-Ainaro no korerdór sira ligadu, liu-liu liga ba área Risku Dezastres Naturais ne’ebé MSSI mak sai hanesan nain ba projetu no fó fiar ba PLAN International hodi implementa, Seremónia inaugurasaun ne’e hala’o iha Suku Fatubosa, Munisípiu Aileu no Suku Railaco Leten, Munisípiu Ermera, Loron Sexta-Feira, (26/10/2018).
Iha oportunidade ne’e, Vise-Ministra Solidariedade Sosiál no Inkluzaun, Signi Verdial hateten, “Ohin ita inaugura ponte ne’e no ponte ne’e sei fó benefísiu bo’ot ba ita nia komunidade sira iha suku Fatubosa, por volta 2000 mil komunidades ne’ebé hela iha suku ida ne’e hodi asesu ba ponte ne’e, liu-liu ba labarik sira iha difikuldade bo’ot wainhhira tempu udan atu asesu ba eskola, tanba ne’e ponte ne’e bele fasilita sira hodi sira bele kontinua nafatin prosesu aprendisazen, aleinde ne’e, bele ona fasilita ba ita nia inan feton sira hodi lori sira nia produtu ba iha merkadu wainhira iha tempu udan”.
Ita mós fó agradese ba Governu Japão ne’ebé ho laran di’ak bele fó fundus mai ita atu bele hala’o obra hirak ne’e, mesmu fundus ne’e ki’ik maibé valor projetu ne’e fó impaktu positivu ne’ebé bo’ot ba ita nia komunidade sira.
Dehan Vise-Ministra, Projetu ne’e naturalmente ita hili área sira ne’ebé iha kosta sul, espesialmente ba área sira ne’ebé iha impaktu bo’ot ba iha risku dezastre naturais, hanesan Manufahi, Ainaro, Aileu no Ermera, fatin hirak ne’e ita fó prioridade bo’ot.
Vise-Ministra realsa liu tan, tenke orgulhu ba saida mak Governu Japão fó ona ba ita i projetu hirak ne’e ita mós tenke kuida ho di’ak, tanba ita mak nain ba obra hirak ne’e hodi ita bele uza ba tempu ne’ebé naruk.
Hosi parte governu kontinua nafatin halo parseria no buka fundus hosi ita nia duadores sira atu bele kontinua fasilita programa hirak ne’e ba iha fatin sira seluk ne’ebé presiza no seidauk hetan azuda, dehan Vise-Ministra.
Partisipa iha seremónia hand over ne’e mak hanesan, Diretór Jerál Servisu Corporativu MSSI, Rui Manuel Gago Exposto, Administradór Munisípius, Representantes Liñas Ministeriais, Autoridades Lokais inklui Komunidades.
