VISE-MINISTRA MSSI VIZITA BA MUNISÍPIU MANATUTO

Vizita ofisiál Vise-Ministra Solidariedade Sosiál no Inkluzaun, Signi Verdial ho ninia ekipa ba Munisípiu Manatuto hodi hala’o enkontru ho Autoridades Munisípiu, Postu no Autoridade Komunitárias kona-ba programa Ministériu Solidariedade Sosiál no Inkluzaun-MSSI. Atividade ne’e hala’o iha sala enkontru Administrasaun Munisípiu Manatuto, Loron Sesta-Feira, (14/06/2019).

Enkontru refere, Autoridades Munisípiu, Postu no Autoridade Komunitárias preokupa liu mak, problema ba subsidiu idosos no Inválides, Bolsa da Mãe, Desastres Naturais inklui kareta mate no kaisoens.

Iha okaziaun ne’e, Vise-Ministra Solidariedade Sosiál no Inkluzaun, Signi Verdial hateten, Objetivu hosi vizita ne’e mak atu rona rasik preokupasoens no dezafius ne’ebé mak durante ne’e Autoridades Munisípiu, Postu no Autoridades Komunitárias inklui Komunidades sira enfrenta, liu-liu liga ba programa Ministériu Solidariedade Sosiál no Inkluzaun nian.

Ho enkontru ida ne’e mós atu halo avaliasaun ida ba servisu ne’ebé MSSI durante ne’e fornese ona ba ita nia komunidade sira hodi hatene saida mak la’o di’ak ona no saida mak seidauk, nune’e hamutuk atu ita bele hadia iha futuru, liu hosi planu, programa no orsamentu tinan 2020 nian.

Politika ba iha futuru, Vise-Ministra MSSI hanoin katak, asuntu desastres no kareta mate inklui kaisaun, desentraliza ona servisu ne’e ba iha munisípiu atu nune’e ninia implementasaun bele efetivu no efisiénsia hodi atende di’ak liu tan ba komunidade sira, liu hosi estrutura Autoridades Munisípiu, Postu no Autoridades Komunitárias.

Entertantu, Representante Administradór Munisípiu Manatuto, Agerpino da Silva S. R. Costa hato’o problema ne’ebé iha relasaun ho servisu MSSI nian, liu-liu iha tinan 2019 nia laran Manatuto hetan desastres rua, primeiru mak kareta mate hetan desastre no agora dadaun seidauk halo manutensaun nomós negosiante sira iha merkadu nian, sira nia Baraka hetan ahi han, tamba ne’e nia husu ba MSSI atu bele tau matan ba asuntus hirak ne’e.

Hafoin enkontru ho Autoridades Munisípiu, Postu no Autoridades Komunitárias Munisípiu Manatuto, Vise-Ministra ho ninia ekipa kontinua hala’o enkontru ho Diretór Sentru Solidariedade Sosiál Munisípu Manatuto ho ninia funsionárius tomak hodi bele hatene mós sira ninia preokupasoens no difikuldades ne’ebé durante ne’e sira enfrenta ba iha atendimentu komunidade sira.