Vise-Ministru MSS inagura kampu futeból iha zumalai

Iha meius barak atu hametin no harii pas iha rai laran, liu hosi Departamentu Harii Pas no Koezaun Sosiál, Vise-Ministru Solidariedade Sosiál, Jacinto Rigoberto G. de Deus, halo ona inagurasaun ba kampu futeból refere no fahe ekipamentu desportivu hosi Ministériu Solidariedade Sosiál no Sekretáriu Estadu Juventude Desportu (SEJD), hamutuk ho United Nation Development Programme (UNDP), iha Sub-Distritu Zumalai, loron 21/02/2013.

Iha serimonia inagurasaun ida ne’e, Vise-Ministru hato’o parabens ba juventude no komunidade sira tenki iha konsénsia, responsabilidade morál no espíritu Nasionálismu iha konteúdu hamutuk rezolve problema ida ne’e iha tempu badak, atu asegura kontinuidade simu malu no kria amizade. Nune’e tenki iha desportivu ida di’ak mak bele deside hamutuk ho UNDP, hodi harii fasilidade infraestrutura fíziku ida iha Zumalai.

Haktuir Vise-Ministru, inagurasaun ba fatin ida ne’e hanesan meus ida hodi haluhan tiha konflitu, no haree ba oin hodi kria fali amizade hosi suku hotu-hotu ne’ebé mak iha Sub-Distritu Zumalai nia laran. Nune’e mós bele kria no hatudu talenta iha área desportivu nia, atu bele sai futu bolista di’ak hodi reprezenta Suai ba iha kompetisaun Nasionál.

Iha serimónia inagurasaun kampu ne’e. Entrega mós ekipamentu desportu nian hanesan farda, bola, árbitu hodi fasilita dadauk juventude sira nia atividades, ne’ebé sei koordena nafatin ho liñas Ministériais hirak seluk hanesan SEJD, atu iha futuru bele koloka nafatin orsamentu iha área refere.

Iha fatin hanesan Diretór Nasionál Asisténsia no Koezaun Sosiál, Amandio Amaral Freitas informa katak, prosesu kampu futu bol ida ne’e, inisiu estabelese tanba kauza konflitu ne’ebé akontese hosi 2011, nune’e bele diminui ba konflitus ne’ebé iha.

Diretór ne’e subliña tan katak, ba oin suporta morál nafatin ba juventude, komunidade no autoridade lokal, hodi halo manutensaun ba kampu, no mós enkoraja atu kuda du’ut iha kampu ida ne’e, nune’e labele hetan estragus hosi inundasaun no juventude bele hetan treinamentu ruma ne’ebé sei entrega ba SEJD hodi aliña tuir programa ne’ebé mak planea kada tinan.

Seluk hosi ne’e, Xefe Depertamentu Harii Pas no Koezaun Sosiál, Agostinho C. Belo hato’o mós, kampu futu bol ne’e konstroi hosi kompañia Otsoparis Unip. Lda, ne’ebé maneja hosi Departamentu Harii Pas no Koezaun Sosiál, MSS-UNDP no hetan apoiu fundus hosi AusAID ho motante $. 77,985,87, ho fulan 3 nia laran.

Nune’e mós Administrdór Sub-Distritu Zumalai, Manuel Agostinho Freitas apresia teb-tebes ba perzensa kampu futu bol ida ne’e atu hamenus konflitus ne’ebé akontese iha tinan kotuk, nune’e kria fila fali amizade entre joven liu-liu ba arte marsiais. Administradór garante katak, bele minimiza konflitu ne’e la’ós hosi desportivu ne’e deit, maibé persija fó edukasaun sívika, liu hosi treinamentu ruma kona-ba mentalidade.

Iha inagurasaun ida ne’e, asiste mós hosi Sekretáriu Estadu Obras Públiku, Luis Vaz Rodriques, representante SEJD, Diretór UNDP, Mikiko Tanaka, Amo Vigariu Jerál Parokia Suai, Diretór DNACS, Xefe DHPKS, Administradór Distritu Suai no Sub-Distritu Zumalai, Xefes Sukus, Komunidade no Juventude Zumalai tomak.

This post is also available in: Tetum