VÍTIMA DEZASTRES NATURAIS UMA KAIN 2 HETAN APOIU

Ministériu Solidariedade Sosiál no Inkluzaun-MSSI, halo ona distribuisaun materiál konstrusaun ba vítima dezastres naturais (ahi han) uma kain 2, materiál konstrusaun hirak ne’e entrega simbolikamente hosi Ministra Solidariedade Sosiál no Inkluzaun, Armanda Berta dos Santos, ne’ebé akompaña hosi Administradór Posto Administrativo Dom Aleixo inklui Autoridade Lokal Suku Bairo Pite. Atividade ne’e halao iha Bairo Pite, loron Tersa-Feira, (31/07/2018).

Apoiu materiál konstrusaun hirak ne’e mak hanesan Besi, Kalen, Pregu no Sementi. Antes fahe materiál konstrusaun ba vítima sira Ministra Solidariedade Sosiál no Inkluzaun hamutuk ho nia komitiva hala’o sorumutu ida ho autoridade lokal nomós vítimas ahi han uma iha sede suku bairo pite.

Iha okaziaun ne’e, Ministra Solidariedade Sosiál no Inkluzaun hato’o nia sentimentu solidariedade ba família vítima ne’ebe mak nia uma hetan estragus, dehan Ministra, servisu sosiál atende ema hotu no oinsá atu haree ema hotu ne’ebé mak afeita ba dezastre naturais, husu mós ba Administrador Posto ho nia estrutura tomak iha nível suku to’o aldeia atu servisu hamutuk ho ministériu solidariedade sosiál no Inkluzaun wainhira mosu dezastre ruma atu bele hetan kontaktu direta liu husi pontu fokal sira hodi nune’e bele halo atendementu.

Nune’e mós, Diretóra Sentru Solidariedade Sosiál Munisípiu Díli, Silvia Verdial hateten, sentru solidariedade sosiál Munisípiu Díli iha responsabilidade másimu hodi fó atendementu ba vítima dezastre sira ne’ebe mak akontese iha Munisípiu Díli nia laran.

Diretóra akresenta liu tan, akontesementu ahi han uma iha suku bairo pite aldeia avansa posto administrativo dom aleixo iha loron 23 fulan Jullu, ne’ebe afeita ba família rua nia uma hetan estragus total, tamba ne’e mak, sentru solidariedae sosiál munisípiu Díli halo ekipa konjunta ida hamutuk ho autoridade lokal suku bairo pite tun direta ba iha fatin akontesementu hodi halo assementu imediata no halo verifikasaun. Dadus hirak ne’e ami fóti i relata ba iha diresaun ne’ebe kompetente atu responde ba dezastre sira ne’e no iha momentu ne’e kedas diresaun nasionál jestaun dezastre halo pedido ida ba ministra solidariedade sosiál no Inkluzaun hodi bele hetan aprovasaun ba materiál rekuperasaun ba vítimas ahi han uma, dehan diretóra.

Iha sorin seluk, Administradór Dom Alexo, Simplicio Dos Santos Mendonça hateten, servisu ida ne’e realiza tamba iha kordenasaun ne’ebé mak di’ak entre pontu fókal dezastres naturaisa munisípiu no postu administrativo sira ne’ebé kopera hamutuk ho sentru solidariedade no inkluzaun Munisípiu Díli nian hodi halo intervensaun nomós iha liña kondenasaun ne’ebe mak di’ak entre administradór postu, suku to’o aldeia.