VIZITA TRABALLU MINISTRA MSSI IHA MUNISÍPIU MALIANA
Ministra Solidariedade Sosiál no Inkluzaun, Armanda Berta Dos Santos Hala’o Vizita Traballu Ba Munisípiu Bobonaro Hodi haree Kondisaun no Rona Preokupasoins Diretamente Hosi Sentru Solidariedade Sosiál Munisípiu Maliana, Autoridades Lokais Inklui Komunidade sira Nune’e Bele Hametin Liña Koordenasaun Servisus Iha Área Sosiais Ninian, Enkontru refere hala’o iha Salaun Administrasaun Munisípiu Maliana, Loron Sexta-Feira, (16/11/2018).
Iha visita traballu ida ne’e Ministra ho nia komitiva hala’o visita ba dahuluk iha Sentru Solidarieade Sosiál Munisípiu Maliana hafoin kontinua hala’o vizita Instituisoins Solidariedade Sosiál-ISS no ikus liu, hala’o enkontru ho autoridade munisípiu maliana.
Iha enkontru ida ne’e, diretór Sentru Solidariedade Sosial Munisípiu Maliana, Acacio Gonçalves hato’o katak hanesan ejekutadór ne’ebé simu programa hosi nasionál ministériu solidariedade sosiál nian mai iha baze, ami labele perkore hotu área sosiál nian ne’ebé luan tebes, tamba menus rekursus humanus nomós difikuldade ba kombustivel ne’ebé ho deit orsamentu duodesimu ho nune’e ami ladun fó atendementu máximu ba iha komunidade.
Alende ne’e, enkontru ho autoridade lokal, sira hato’o mós difikuldades ne’ebé mak hasoru liu liu ba iha programa bolsa da mãe no pagamentu ba programa idosos no inválidos ba sira ne’ebé mate ona, tamba dala barak benefisiárius sira lamenta ho kriteria atu hetan osan fulan ne’en ba benefisiárius ne’ebé mate ona, dokumentus ne’ebe sira trata dala barak hasai kustu ne’ebé bo’ot liu tiha orsamentu ne’ebé atu hetan liu liu ba maluk sira ne’ebé hela iha áreas remotas, nune’e husu ba ministériu no BNCTL atu bele kria mekanismu ida ne’ebé di’ak hodi nune’e atu bele hafasil benefisiárius sira ne’ebé mate ona hodi hetan sira nia direitu.
Iha Intervensaun Ministra MSSI hato’o katak, atu hala’o dezenvolvimentu presija ita hotu nia serbisu hamutuk para atu dezenvolve ita nia nasaun, hare’e ba situasaun hirak ne’ebé mak akontese iha buat balun la’o di’ak no buat balun presija hadia, tamba ne’e ohin ita hasoru malu iha fatin ida ne’e atu buka solusaun hamutuk liu hosi diskusaun aberta ida nune’e ita bele fó hanoin ba malu hodi hametin liña koordenasaun servisu, liu-liu iha área sosiais nian ho di’ak liu tan hodi bele fó atendementu ba ita nia komunidade sira ho efisiénsia no efetivu liu tan, katak Ministra MSSI.
Nune’e mós, Ministra Solidariedade Sosial hala’o visita ba iha instituisaun solidariedade sosiál, Irmãs Reparadoras de Nosa Senhora de Fatima, iha Suku Memo no Uma Mahon Maria Tapo, iha Suku Ritabou ne’ebé MSSI apoiu liu hosi Sentru Solidariedade Sosial Munisípiu Maliana. Visita ba Instituisaun solidariedade sosiál hirak ne’e atu bele haree diretamente kondisaun no situsaun iha fatin refere nomós rona saida mak instituisaun solidariedade sira infrente iha baze.
Akompaña Ministra iha vizita traballu refere mak hanesan, Diretór Geral Protesaun Sosiál-MSSI, Eugénio João Amadio de Maria Soares, Komisáriu Ezekutivu ba Komisaun Nasionál ba Kombate HIV/Sida, Daniel Marçal hamutuk ho Diretór Nasionais no Munisipál.
