VMSSI PARTISIPA SEREMÓNIA ANIVERSÁRIU FOKUPERS

Vise-Ministra Solidariedade Sosiál no Inklusaun-VMSSI, Signi Verdial, partisipa seremónia aniversáriu ba dala-XXI no lansa mós Livro Jornada ba Organizasaun Naun Govermental-ONG Forum Komunikasaun Ba Feto Timor-Leste-FOKUPERS ho tema “Lolo Liman Ba Malu Hodi Hapara Violénsia Hasoru Feto”. Seremónia refere hala’o iha Edifísiu FOKUPERS Palapasu-Dili, Loron Tersa-Feira, (31/07/2018).

Durante ne’e FOKUPERS sai mós hanesan parseiru ida hosi Ministériu Solidariedade Sosiál no Inklusaun-MSSI hodi bele hatutan mós servisu Ministériu nian, liu-liu iha área protesaun Feto no Labarik.

Iha oportunidade ne’e, Vise-Ministra Solidariedade Sosiál no Inklusaun-MSSI, Signi Verdial fó parabéns ba FOKUPERS ne’ebé ohin halo ona aniversáriu ba dala-XXI ne’ebé durante ne’e hala’o servisu ho di’ak, liu-liu oinsá bele haree no fó protesaun ba Feto no Labarik.

“lori ministériu nia naran hau hato’o katak VIII Governu Konstituisionál reafirma ninia suporta tomak ba programa ne’ebé FOKUPERS hala’o, ami sei kontinua tau nafatin atensaun ba FOKUPERS, liu hosi parseiru ne’ebé ita halo ona, tanba ne’e ita persiza servisu hamutuk hapara violénsia kontra feto no labarik, liu hosi muda ita nia hanoin, ita persiza kontinua halo advokasia nomós investe ba ita nia feto maluk sira, tanba ne’e hau nia hanoin feto no labarik la merese hetan diskriminasaun, maibé sira persiza hetan tratamentu ida ne’ebé dignu iha kualker tempu no situasaun”, dehan Vise-Ministra.

Partisipa iha seremónia ne’e mak hanesan, Sekretáriu Estado Igualdade no Inklusaun, Sosiedade Sivil hosi Gabinete PM, Representante UN Women, Deputadus, Presidente Konsellu Imprensa, Defensor Públiku, Adjuntu Komisaun Anti Korupsaun, Diretores hosi sosiedade Sivil, Presidente Imprensa Públiku, Representante JSMP, Representante Embaixada Australia, Komisaun Nasionál Chega, Diretór Nasionál Dezenvolvimentu Sosiál-DNDS.